جوعارعى سوت شەنەۋنىكتەردىڭ ويىن مەكەمەلەرىنە بارعانى تۋرالى اقپاراتقا تۇسىنىكتەمە بەردى، دەپ حابارلايدى “ادىرنا” ۇلتتىق پورتالى Sputnik.kz سايتىنا سىلتەپ.
بۇعان دەيىن جۋرناليست ميحايل كوزاچكوۆ تەلەگرام-كانالىندا الماتى وبلىسى پروكۋراتۋراسىنىڭ مەملەكەتتىك قىزمەتشىلەردىڭ كازينوعا بارعانى تۋرالى حاتىنىڭ سكرينشوتىن جاريالادى. تىزىمدە جوعارعى سوتتىڭ 7 قىزمەتكەرى دە بار.
الماتى وبلىستىق پروكۋراتۋراسىنىڭ ءباسپاسوز حاتشىسى ماقسات ءابىروۆ Sputnik تىلشىسىنە "اتالعان فاكتىلەر" بويىنشا كازينوداعى تەكسەرىستەر جايلى حاتتىڭ جىبەرىلگەنىن راستادى.
"جوعارعى سوتتىڭ جەتى وكىلى ويىن مەكەمەلەرىنە بارعانى تۋرالى اقپارات شىندىققا جاناسپايدى. ءبىز الماتى وبلىسىنىڭ پروكۋراتۋراسىنا جۇگىنىپ، بۇل قاتەلىكتى تۇزەتۋدى سۇرادىق. جوعارعى سوتتىڭ سۋديالارى دا، جوعارعى سوت اپپاراتىنىڭ قىزمەتكەرلەرى دە بۇل تىزىمدە جوق", - دەپ جازدى ءوز اككاۋنتىندا جوعارعى سوت جانىنداعى سوتتار قىزمەتىن قامتاماسىز ەتۋ دەپارتامەنتى باسشىسىنىڭ ورىنباسارى ەلدوس جۇماقسانوۆ.
پروكۋراتۋرا تىزىمىنە ءۇش سۋديا مەن ءتورت مەملەكەتتىك قىزمەتشى ەنگەن، دەپ ناقتىلادى جۇماقسانوۆ. ونىڭ ىشىندە ەكى سۋديا جۇمىستان شىعارىلعان: بىرەۋى 2020 جىلى تەرىس سەبەپتەرمەن قىزمەتتەن كەتتى. ال ءۇشىنشى سۋديا 2021 جىلى اۋداندىق سوتقا اۋىستىرىلدى.
جۇماقسانوۆ اتالعان سۋديانىڭ ماتەريالدارى سۋديا ەتيكاسى جونىندەگى كوميسسيانىڭ قاراۋىنا بەرىلەتىنىن اتاپ ءوتتى.
جوعارعى سوت وكىلى سوت جۇيەسىندە ىستەگەن مەملەكەتتىك قىزمەتشىلەر تۋرالى دا ايتتى.
ء"بىر قىزمەتكەر سوت جۇيەسىنەن ءوز قالاۋىمەن 2021 جىلى كەتكەن بولاتىن. قالعاندارىنا قاتىستى قىزمەتتىك تەكسەرىس باستالدى", - دەدى جۇماقسانوۆ.
ەسكە سالايىق، بۇعان دەيىن جەلىدە الماتى وبلىسى پروكۋراتۋراسى جۇرگىزگەن تەكسەرىستىڭ ناتيجەسى جاريالاندى. وندا كازينوعا ءجيى بارىپ تۇراتىن 300-دەن استام مەملەكەتتىك قىزمەتشى تۋرالى ايتىلعان. ءتۇرلى مەملەكەتتىك ورگانداردىڭ 305 قىزمەتكەرى قۇمار ويىندارعا 507 ملن تەڭگە جۇمساعان.
