Joǧarǧy sot şeneunıkterdıŋ oiyn mekemelerıne barǧany turaly aqparatqa tüsınıkteme berdı, dep habarlaidy “Adyrna” ūlttyq portaly Sputnik.kz saityna sıltep.
Būǧan deiın jurnalist Mihail Kozachkov telegram-kanalynda Almaty oblysy prokuraturasynyŋ memlekettık qyzmetşılerdıŋ kazinoǧa barǧany turaly hatynyŋ skrinşotyn jariialady. Tızımde Joǧarǧy sottyŋ 7 qyzmetkerı de bar.
Almaty oblystyq prokuraturasynyŋ baspasöz hatşysy Maqsat Äbırov Sputnik tılşısıne "atalǧan faktıler" boiynşa kazinodaǧy tekserıster jaily hattyŋ jıberılgenın rastady.
"Joǧarǧy sottyŋ jetı ökılı oiyn mekemelerıne barǧany turaly aqparat şyndyqqa janaspaidy. Bız Almaty oblysynyŋ prokuraturasyna jügınıp, būl qatelıktı tüzetudı sūradyq. Joǧarǧy sottyŋ sudialary da, Joǧarǧy sot apparatynyŋ qyzmetkerlerı de būl tızımde joq", - dep jazdy öz akkauntynda Joǧarǧy sot janyndaǧy sottar qyzmetın qamtamasyz etu departamentı basşysynyŋ orynbasary Eldos Jūmaqsanov.
Prokuratura tızımıne üş sudia men tört memlekettık qyzmetşı engen, dep naqtylady Jūmaqsanov. Onyŋ ışınde ekı sudia jūmystan şyǧarylǧan: bıreuı 2020 jyly terıs sebeptermen qyzmetten kettı. Al üşınşı sudia 2021 jyly audandyq sotqa auystyryldy.
Jūmaqsanov atalǧan sudianyŋ materialdary sudia etikasy jönındegı komissiianyŋ qarauyna berıletının atap öttı.
Joǧarǧy sot ökılı sot jüiesınde ıstegen memlekettık qyzmetşıler turaly da aitty.
"Bır qyzmetker sot jüiesınen öz qalauymen 2021 jyly ketken bolatyn. Qalǧandaryna qatysty qyzmettık tekserıs bastaldy", - dedı Jūmaqsanov.
Eske salaiyq, būǧan deiın jelıde Almaty oblysy prokuraturasy jürgızgen tekserıstıŋ nätijesı jariialandy. Onda kazinoǧa jiı baryp tūratyn 300-den astam memlekettık qyzmetşı turaly aitylǧan. Türlı memlekettık organdardyŋ 305 qyzmetkerı qūmar oiyndarǧa 507 mln teŋge jūmsaǧan.
