الماتى وبلىسى قىزىلتۋ اۋىلىنىڭ وقۋشىلارى سىنىپ كابينەتتەرىنىڭ تاپشىلىعىنان ساباقتى اكت زالىندا وقۋعا ءماجبۇر، دەپ حابارلايدى “ادىرنا” ۇلتتىق پورتالى.
استانا تەلەارناسىنىڭ مالىمەتىنشە، 788 ورىندىق مەكتەپتە 2000-عا جۋىق بالا ءبىلىم الىپ جاتىر. قىزىلتۋداعى جالعىز مەكتەپكە كورشى اۋىلداردان دا بالالار اعىلىپ كەلەدى. بىراق ولاردى تاسيتىن ارنايى اۆتوبۋس جوق. ال قالامەن ەكى ورتاعا قاتىنايتىن جالعىز قوعامدىق كولىك جۇرگىزۋشىلەرى وقۋشىلاردى "سىيمايسىڭ" دەپ، مىنگىزبەيدى ەكەن.
“اۆتوبۋستاردىڭ كەيبىرەۋلەرى توقتاماي كەتىپ قالاتىنى بار. اۆتوبۋس وتە قازىر ءجيى جۇرمەيتىن بولىپ كەتتى. الىس ارالارى، وتە الىس. يمەننو بالالارعا توقتامايدى. قانشاما بالا بار. وقۋشىلار ءار جاقتان وسى مەكتەپكە كەلىپ وقيدى”، – دەيدى قىزىلتۋ اۋىلىنىڭ تۇرعىنى توعجان مۇقاشقىزى.
مەكتەپ اكىمشىلىگى ءبىلىم ورداسىنا وقۋشىلاردىڭ سىيماي جاتقانىن مويىندادى. سىنىپ كابينەتتەرىنىڭ تاپشىلىعىنان بالالار ساباقتى اكت زالىندا وقۋعا ءماجبۇر. كەيبىر پاندەر ونلاين وتەدى. سەبەبى، كورشى اۋىلداعى مەكتەپتە جوندەۋ جۇمىستارى ءجۇرىپ جاتقان كورىنەدى. سوندىقتان، ونداعى 600 وقۋشى قازىر قىزىلتۋ اۋىلىنا قاتىناپ ءجۇر. ال جوندەۋ جۇمىستارى قاشان اياقتالارى بەلگىسىز.
“مەكتەپتىڭ سىيىمدىلىعى - 788 ورىندىق. بىراق قازىرگى تاڭدا 2000-عا جۋىق بالا وقىپ جاتىر. بيىلعى وقۋ جىلىنان باستاپ گۇلدالا وكرۋگىندە 21 مەكتەپ كۇردەلى جوندەۋدەن ءوتىپ جاتىر. سول مەكتەپتىڭ 600 بالاسى ءبىزدىڭ مەكتەپكە كەلىپ وقيدى", – دەيدى № 24 ورتا مەكتەبى ديرەكتورىنىڭ ورىنباسارى شايزات قالىقوۆا.
اكىمدىكتەگىلەردىڭ سوزىنشە، 2023 جىلى اۋىلدا جاڭا مەكتەپتىڭ قۇرىلىسى باستالادى. اۆتوبۋس ماسەلەسى دە وقۋ جىلىنىڭ ەكىنشى توقسانىندا شەشىلەتىنىن ايتتى.
“مەكتەپ تۋرالى بىزدە 2 دە 42 جەر ۋچاسكەسى دايىندالىپ، سول جەرگە پسد ءوتتى. ەكسپەرتيزادان ءوتتى. بارلىعى دايىن. 600 ورىندىق مەكتەپ سالىنادى. پودۆوز بويىنشا 19 قازان كۇنى پورتالعا زاياۆكا بەرىلدى كونكۋرس بويىنشا. بالا سانىنا بايلانىستى زاياۆكا بەردىك", – دەدى پانفيلوۆ اۋىلدىق وكرۋگى اكىمىنىڭ ورىنباسارى ساۋلە مىقتىباەۆا.
