Almaty oblysy Qyzyltý aýylynyń oqýshylary synyp kabınetteriniń tapshylyǵynan sabaqty akt zalynda oqýǵa májbúr, dep habarlaıdy “Adyrna” ulttyq portaly.
Astana telearnasynyń málimetinshe, 788 oryndyq mektepte 2000-ǵa jýyq bala bilim alyp jatyr. Qyzyltýdaǵy jalǵyz mektepke kórshi aýyldardan da balalar aǵylyp keledi. Biraq olardy tasıtyn arnaıy avtobýs joq. Al qalamen eki ortaǵa qatynaıtyn jalǵyz qoǵamdyq kólik júrgizýshileri oqýshylardy "syımaısyń" dep, mingizbeıdi eken.
“Avtobýstardyń keıbireýleri toqtamaı ketip qalatyny bar. Avtobýs óte qazir jıi júrmeıtin bolyp ketti. Alys aralary, óte alys. Imenno balalarǵa toqtamaıdy. Qanshama bala bar. Oqýshylar ár jaqtan osy mektepke kelip oqıdy”, – deıdi Qyzyltý aýylynyń turǵyny Toǵjan Muqashqyzy.
Mektep ákimshiligi bilim ordasyna oqýshylardyń syımaı jatqanyn moıyndady. Synyp kabınetteriniń tapshylyǵynan balalar sabaqty akt zalynda oqýǵa májbúr. Keıbir pánder onlaın ótedi. Sebebi, kórshi aýyldaǵy mektepte jóndeý jumystary júrip jatqan kórinedi. Sondyqtan, ondaǵy 600 oqýshy qazir Qyzyltý aýylyna qatynap júr. Al jóndeý jumystary qashan aıaqtalary belgisiz.
“Mekteptiń syıymdylyǵy - 788 oryndyq. Biraq qazirgi tańda 2000-ǵa jýyq bala oqyp jatyr. Bıylǵy oqý jylynan bastap Gúldala okrýginde 21 mektep kúrdeli jóndeýden ótip jatyr. Sol mekteptiń 600 balasy bizdiń mektepke kelip oqıdy", – deıdi № 24 orta mektebi dırektorynyń orynbasary Shaızat Qalyqova.
Ákimdiktegilerdiń sózinshe, 2023 jyly aýylda jańa mekteptiń qurylysy bastalady. Avtobýs máselesi de oqý jylynyń ekinshi toqsanynda sheshiletinin aıtty.
“Mektep týraly bizde 2 de 42 jer ýchaskesi daıyndalyp, sol jerge PSD ótti. Ekspertızadan ótti. Barlyǵy daıyn. 600 oryndyq mektep salynady. Podvoz boıynsha 19 qazan kúni portalǵa zaıavka berildi konkýrs boıynsha. Bala sanyna baılanysty zaıavka berdik", – dedi Panfılov aýyldyq okrýgi ákiminiń orynbasary Sáýle Myqtybaeva.
