ماسلەنيتسا — شىعىس سلاۆيانداردىڭ ءداستۇرلى مەيرامى. «ۋيكيپەديادا» وعان «ۇلى پوست الدىنداعى (پوست – حريستيانداردىڭ اس ءىشۋدى شەكتەۋى) اپتادا اتالاىپ وتەتىن، ءون بويىنا حريستياندىققا دەيىنگى سلاۆيان ميفولوگياسى ەلەمەنتتەرىن نەگىز ەتكەن مەيرام» دەگەن سيپاتتاما بەرىلگەن.
«شىعىس سلاۆيانداردىڭ حالىقتىق كۇنتىزبەسىندە مەيرام قىس پەن كوكتەمنىڭ شەكاراسىن ايقىندايدى. ماسلەنيتسا كاتوليكتەردىڭ «مايلى سەيسەنبى» جانە «مياسوپۋست» سالتتارىمەن «تۋىس». ورىس پراۆوسلاۆ شىركەۋىنىڭ كۇنتىزبەسىندە بۇل كەزەڭ «سىرنايا سەدميتسا» دەپ اتالادى. «مياسوپۋست»، «نەدەليا مياسوپۋستنايا»، «سىرنايا نەدەليا» اتاۋلارى رۋستە «شىركەۋلىك» ۇعىمدارعا قاتىستى قولدانىلعان» دەيدى تاعى دا ۋيكيپەديا.
ماسلەنيتسانى اتاپ ءوتۋ كۇنى جىل سايىن پاسحانى مەرەكەلەۋ كۇنىنە قاراي وزگەرىپ وتىرادى. ءداستۇرلى اتريبۋتتارى – ماسلەنيتسا تۇلىبى، شانامەن سىرعاناۋ، ساۋىق-سايران قۇرۋ. ورىستار قۇيماق جانە قالاش پىسىرەدى.
ۋيكيپەديا «ماسلەنيتسا» مەيرامىنىڭ ءتيپىن «حالىقتىق-حريستياندىق» دەپ ايقىنداي تۇسەدى.
ءبىز ۋيكيپەديانى نەگە اقتارىپ وتىرمىز؟ سەبەبى بىرنەشە جىلدان بەرى ەكىباستۇز قالاسىنىڭ بالاباقشالارىندا وسى مەيرام تۇراقتى تۇردە اتالىپ ءجۇر. بالاباقشا باسشىلارىنىڭ كوبى مۇنى ءبىر شانامەن سىرعاناۋ نەمەسە قۇيماق جەۋ مەيرامى دەپ الدانىپ جۇرسە كەرەك. ءدىني مەيرام ەكەنىنە ءمان بەرىپ جاتقان ەشكىم جوق.
جالپى، ەكىباستۇز بالاباقشالارىندا ماسلەنيتسا تويلاۋ ن.نەفەدوۆا حانىم قالا اكىمىنىڭ الەۋمەتتىك ماسەلەلەر جونىندەگى ورىنباسارى بولعان كەزدەن بەلەڭ الدى.
تازا ورىس بالاباقشالارى اتاپ ءوتىپ جاتسا ءبىرسارى دەيسىڭ عوي. قازاق بالاباقشالارى دا جىل سايىن قۇيماق جەپ جەلىگۋىن قويار ەمەس. بۇيتە بەرسە تامان قازاق بالاسى شوقىنىپ كەتۋى عاجاپ ەمەس شىعار. ونسىز دا ەكىباستۇزدىڭ ن.نەفەدوۆا اكىم ورىنباسارى بولعان كەزدە كرەششەنيەدە كيىز ءۇي تىگىپ، اتى شارتاراپقا جايىلىپ ەدى...
قازىر ن.نەفەدوۆا بۇل قالادا قىزمەت ىستەمەيدى، بىراق سوڭىندا قالعان قۇربىلارى ونىڭ قالدىرعان «رۋحاني مۇرالارىنا» بەرىك سىقىلدى. ماسەلەن، قالىڭ قازاق ەڭبەك ەتەتىن №21 بالاباقشادا «ماسلەنيتسا» بيىل ۇلتتىق فەستيۆالدان كەم اتالىپ وتپەگەن. سونىمەن بىرگە، بالاباقشا اۋلاسىندا تۇلىپ (چۋچەلو) ورتەلىپتى. بالالارعا سىرىڭكە جاعۋعا بولمايدى دەپ ۇيرەتۋدىڭ ورنىنا تۇلىپ ورتەپ، كەرى تاربيە بەرگەن پەداگوگتار قاۋىمىنا نە دەرىمىزدى بىلمەدىك. وسىدان كەيىن بالاقايلار ادامدى جايباراقات ورتەۋگە بولادى ەكەن دەگەن ويدا قالماسىنا كىم كەپىل؟! بۇل ارەكەت جاس وسكىندى قاتالدىققا تاربيەلەمەسىنە قالاي كوز جەتكىزەمىز؟!
بۇل شارانى بالاباقشا ۇجىمى ماقتانىش قىلىپ الەۋمەتتىك جەلىگە جارنامالاپ، «فولكلورلىق مەرەكە» دەپ كوزبوياۋشىلىق جاساعان. ۆيدەودا تامان قازاق بالاسى مويىندارىنا «سۋشكي» اسىپ الىپ، بالاباقشا اۋلاسىندا دىردەكتەپ ءجۇر. اۋلاداعى جاعالاي ۇستەلدەر قۇيماق، قالاشتارعا تولى. جالپى، بالالاردىڭ كۇن سۋىقتا بۇرسەڭدەپ دالادا تاعام جەۋى قانشالىقتى دۇرىس – ونى وقىرمان ءوزى باعامداي جاتار.
ال ءبىزدى زايىرلى ەلدىڭ تاربيە مەكەمەسىندە حريستيانداردىڭ حالىقتىق مەيرامىنىڭ وسىنشاما بەلسەندى دارىپتەلىپ جۇرگەنى تولعاندىرادى...
نۇربەك تاۋاسار، پاۆلودار وبلىسى
