قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين الماتى قالاسىنداعى ءا.مارعۇلان اتىنداعى ارحەولوگيا ينستيتۋتىندا «قازاقستان تاريحى: ەجەلگى داۋىردەن بۇگىنگە دەيىن» اتتى جاڭا اكادەميالىق باسىلىمدى ازىرلەپ جاتقان جەتەكشى عالىمدارمەن كەزدەستى، دەپ حابارلادى اقوردا.
مەملەكەت باسشىسى 2021 جىلعى قاڭتاردا جارىق كورگەن «تاۋەلسىزدىك بارىنەن قىمبات» اتتى ماقالاسىندا زاماناۋي عىلىمي تاسىلدەردى قولدانا وتىرىپ، قازاقستان تاريحىنىڭ كوپتومدىعىن دايىنداۋ تۋرالى باستاما كوتەرگەن بولاتىن.
عىلىم جانە جوعارى ءبىلىم ۆيتسە-ءمينيسترى دارحان احمەد-زاكي، سونداي-اق تومداردىڭ رەداكتسيالىق القالارىنىڭ جەتەكشىلەرى مەن مۇشەلەرى – ءا.مارعۇلان اتىنداعى ارحەولوگيا ينستيتۋتىنىڭ باس ديرەكتورى اقان وڭعار، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس عىلىمي قىزمەتكەرى بولات كومەكوۆ، ش.ءۋاليحانوۆ اتىنداعى تاريح جانە ەتنولوگيا ينستيتۋتى ديرەكتورىنىڭ ورىنباسارى جومارت جەڭىس، جوشى ۇلىسىن زەرتتەۋ عىلىمي ينستيتۋتىنىڭ باس عىلىمي قىزمەتكەرى ايبولات كوشكىمباەۆ، ر.ب.سۇلەيمەنوۆ اتىنداعى شىعىستانۋ ينستيتۋتى جانىنداعى تاريحي ماتەريالداردى زەرتتەۋ بويىنشا رەسپۋبليكالىق اقپاراتتىق ورتالىعىنىڭ ديرەكتورى مەرۋەرت ابۋسەيىتوۆا، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ، ش.ءۋاليحانوۆ اتىنداعى تاريح جانە ەتنولوگيا ينستيتۋتى ديرەكتورىنىڭ ورىنباسارى شامەك تىلەۋباەۆ، مەملەكەت تاريحى ينستيتۋتى ديرەكتورىنىڭ ورىنباسارى بۇركىتباي اياعان كوپتومدىقتى ازىرلەۋ جۇمىسى تۋرالى مەملەكەتتىك كەڭەسشىگە اقپارات بەردى.
جيىندا ەرلان قارين قازاقستان تاريحى تۋرالى اكادەميالىق باسىلىمدى ازىرلەۋ بارىسىنىڭ ارالىق قورىتىندىسىن جاسادى. مەملەكەتتىك كەڭەسشى كوپتومدىقتىڭ دايىندىق دارەجەسىن باعالاي وتىرىپ، وسى عىلىمي جوبانى جۇزەگە اسىرۋ ۇتىمدى ءارى وبەكتيۆتى كوزقاراستاردى، بارلىق تاريحي فاكتىلەردى، ماتەريالدار مەن قۇجاتتاردى جان-جاقتى زەردەلەۋدى جانە سوڭعى جىلدارداعى عىلىمي جاڭالىقتاردى اينالىمعا ەنگىزۋدى قاجەت ەتەتىنىن اتاپ ءوتتى.
بۇل جوباعا 5 عىلىمي ينستيتۋت، ەلىمىزدىڭ 250-دەن جانە شەتەلدىڭ 60-تان استام تاريحشى عالىمدارى جۇمىلدىرىلدى. كوپتومدىققا 40-تان اسا ارحەولوگيالىق زەرتتەۋ ماتەريالدارى، تاريح، ارحەولوگيا جانە ەتنوگرافيا سالالارى بويىنشا 300-گە جۋىق ەڭبەك ەنەتىن بولادى. اكادەميالىق باسىلىمدى دايىنداۋ بارىسىندا حالىقارالىق فورۋمداردىڭ، كوپتەگەن عىلىمي كونفەرەنتسيانىڭ، دوڭگەلەك ۇستەلدەر مەن ادىستەمەلىك سەمينارلاردىڭ اياسىندا ارنايى سەكتسيالار ءوتتى. وسى ءىس-شارالاردا عىلىمي زەرتتەۋلەردىڭ ناتيجەلەرى تەكسەرىلدى، سونداي-اق عالىمداردان، ساراپشىلاردان جانە مامانداردان ۇسىنىستار الىندى.
