انتيكوررۋپتسيالىق قىزمەت «اتامەكەن» ۇلتتىق كاسىپكەرلەر پالاتاسى باسقارماسىنىڭ ەكس-توراعاسى ابىلاي مىرزاحمەتوۆتى قانداي قىلمىسقا قاتىستى ۇستالعانىن جاريا ەتتى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«10 مامىردا «اتامەكەن» ۇلتتىق كاسىپكەرلەر پالاتاسى باسقارماسىنىڭ ەكس-توراعاسى ابىلاي مىرزاحمەتوۆ ۇستالدى. ول الاياقتىق پەن كاسىپكەردى ونىڭ تۋىسىن قىلمىستىق جاۋاپكەرشىلىكتەن بوساتۋعا جاردەمدەسكەنى ءۇشىن اسا ءىرى كولەمدە پارا بەرۋگە يتەرمەلەگەن دەگەن كۇدىككە ءىلىندى. كۇدىكتى استانا قالاسى پد ۋۇي-نا قامالدى»، دەلىنگەن حابارلامادا.مالىمەتكە ساي، قازىرگى ۋاقىتتا قىلمىستىق ءىس بويىنشا جەدەل-تەرگەۋ ءىس-شارالارى كەشەنى جۇرگىزىلۋدە. ونىڭ باسقا دا قىلمىستارعا قاتىسى تۋرالى اقپارات تەكسەرىلۋدە. تەرگەۋ جالعاسۋدا. قپك-ءنىڭ 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى. سونىمەن بىرگە، كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.
