الماتى قالاسىندا اۋدانداردىڭ جاڭا اكىمدەرى تاعايىندالدى. كادر ماسەلەلەرى جونىندەگى كەڭەس بارىسىندا قالا اكىمى ەربولات دوساەۆ باسشىلاردى ۇجىممەن تانىستىردى، دەپ حابارلايدى «ادىرنا» ءتىلشىسى.
ناۋرىزباي اۋدانىنىڭ اكىمى بولىپ نازيرا توعىزباەۆا تاعايىندالدى، ول 2021 جىلدىڭ قاڭتار ايىنان باستاپ جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى بولىپ جۇمىس ىستەدى.
اۋەزوۆ اۋدانىنىڭ اكىمى قىزمەتىنە ابزال ەگەمبەرديەۆ كەلدى. 2022 جىلدىڭ تامىز ايىنان باستاپ ول قالانىڭ مەملەكەتتىك اكتيۆتەر باسقارماسىن باسقارعان ەدى.
بوستاندىق اۋدانىنىڭ اكىمى ساندجار الين بولدى. تاعايىندالعانعا دەيىن ەنەرگەتيكا جانە سۋمەن جابدىقتاۋ باسقارماسىنىڭ باسشىسى قىزمەتىن اتقاردى.
المالى اۋدانىن ايدار جاقىباەۆ باسقارادى. 2023 جىلدىڭ قاڭتار ايىنان باستاپ الماتى قالاسى اكىمى اپپاراتى باسشىسىنىڭ مىندەتىن اتقارۋشى بولدى.
