ءمينيستردىڭ كوز جاسى. ولەڭگە تۇسكەن ءورت-جالىن

ەل شىعىسىنان تيگەن ءورت قوعامدى بەي-جاي قالدىرمادى. ەرىكتىلەر قول ۇشىن سوزۋعا اتتانىپ، قالىڭ ەل قولىندا بارىمەن بولىسۋگە تىرىسىپ جاتىر. جالپىۇلتتىق ازا كۇنى جاريالانىپ، حالىقتى جۇمىلدىرۋعا تالپىنىس بايقالادى. اقىندار، جالپى وسى وقيعاعا قاتارداي جاي رەتىندە قاراي المايتىن ادامدار كوڭىل، ىقىلاسىن ولەڭمەن دە بىلدىرگەن. اباي وبلىسىنداعى الاپات ءورتتى اۋىزدىقتاۋ ءۇشىن مۇمكىن بولعان تەحنيكانىڭ ءبارى جۇمىلدىرىلىپ وتىر. ودان بولەك، ءتىلسىز جاۋدىڭ سالدارىنان زارداپ شەككەن سەمەيگە ەلىمىزدىڭ ءار ايماعىنان كومەك كورسەتىلۋدە. الەۋمەتتىك جەلىلەردە حالىقتان اقشا جيناپ، قول ۇشىن سوزىپ جاتقان بەلسەندىلەر دە جەتەرلىك. قارجىلاي كومەكتەن بولەك رۋحاني ازىق بەرىپ، حالىققا سوزدەرىمەن دەمەۋ بولىپ، ەلدى بىرلىككە شاقىرعان اقىندار دا بارشىلىق. «شاراسىز جاتىر كۇيىپ جانىم مەنىڭ» پارلامەنت ءماجىلىسىنىڭ دەپۋتاتى، ايتىسكەر اقىن رينات زايتوۆ تۋعان جەرىن بىلاي دەپ جىرعا قوستى: سەمەيىم —  سىرلى قالام، بيىك ءتورىم. تۋىستارىم، دوستارىم، سۇيىكتى ەلىم. ءتىلسىز جاۋدى جەڭە الماي ساعان تيگەن شاراسىز جاتىر جانىم كۇيىپ مەنىڭ... اقىن جەرلەستەرىن وسىنداي قيىن-قىستاۋ كۇندە سىنباي، بىرلىكتە بولۋعا شاقىرادى: ايتارىم بارشا تۋىس، بار دوسىما بىرلىك كەرەك، جاۋ كەلسە ەل قاسىنا. رۋحىڭ سىنا كورمەسىن، سەمەيلىكتەر اعايىن، سەن قۇلاما، سەن جاسىما! «قانداي جوقتاۋ ايتايىن ەرىم ءۇشىن؟!.» دارىن جاستار سىيلىعىنىڭ لاۋرەاتى، ايتىسكەر اقىن سارا توقتامىسوۆا دا ءوزىنىڭ ينستاگرام پاراقشاسىندا سەمەيلىكتەردى قولداۋعا ارنالعان ولەڭ جولدارىن جاريا ەتتى. سەمەيىم، جۇرەگىمنىڭ بولىگىسىڭ، قازاققا ءبولىپ بەرگەن كوپ ىرىسىن. قاناتىمەن سۋ سەپكەن قارلىعاشتاي قانداي ءسوز تاپسام ەكەن ەلىم ءۇشىن؟ شاراسىزدان شارق ۇرعان شاعالاداي، نەندەي كومەك بەرە الام جەرىم ءۇشىن؟ بوزدالادا شىرىلداپ بوزتورعايداي قانداي جوقتاۋ ايتايىن ەرىم ءۇشىن؟ ازاماتىن جوقتاعان انالاردىڭ كورۋ قيىن كوز جاس پەن كورىنىسىن... اللادان جاردەم سۇراعان سارا توقتامىسوۆا جاڭبىرمەن بارلىق اۋىرتپالىقتىڭ جاڭا وبلىستان كەتۋىن تىلەيدى. «سەپ بولار ما ەكەن كوز جاسىڭ...» قازا تاپقانداردىڭ جاقىندارىمەن كەزدەسۋ بارىسىندا كوزىنە جاس العان ەكولوگيا ءمينيسترى ءزۇلفيا سۇلەيمەنوۆانىڭ ۆيدەوسى كەڭىنەن تارادى. وسىعان بايلانىستى اقىن تورەعالي تاشەنوۆ ءوزىنىڭ فەيسبۋك پاراقشاسىندا «و، ءزۇلفيا، ءزۇلفيا»  ولەڭىمەن ءبولىستى. اقىن ولەڭىندە ەل باسقارۋ جاۋاپكەرشىلىگىن مويىنعا العانداردى بيلىگىڭ وتىر مىڭقيا، شىرەنگەن وڭشەڭ شىرتيا، - دەپ سىنايدى. ءۇنسىز ەگىلىپ جىلاعان مينيسترگە مىنا ولەڭ جولدارىن ارنادى: جىلاي ءتۇس، شىڭعىر، شىرقىرا! سەپ بولار ما ەكەن كوز جاسىڭ، قارا ورمانىڭ — ۇلتىڭا!... «تاعى ىزدەڭدەرشى...» ايتىس اقىنى ءارى جۋرناليست بەكجان اشىرباەۆ تا ەلىمىزدىڭ باسىنا تۇسكەن جايدى جىرىنا ارقاۋ ەتتى. «وت ءبيى» دەپ اتالاتىن ولەڭ ءورت سوندىرۋشىلەردىڭ ورلىگىنە ارنالعان: بوزداق بوپ كەتتى بوتا جاسىندا، ۇرەيلى كوڭىل—اقبوكەن. تاعى ىزدەڭدەرشى وت اراسىندا اداسىپ جۇرگەن جوق پا ەكەن؟.. دەگەن جولدارى وقىعان جاننىڭ جۇرەگىن تەبىرەنتپەي قويماسى انىق. قىزمەتىن اتقارىپ ءجۇرىپ قازا تاپقان بۇگىنگى كۇننىڭ باتىرلارىنا دەگەن قۇرمەتىن «ورمان قورعادى پەرىشتەسىندەي، پەيىشتەن بولعاي مەكەنى!» دەگەن سوزدەرىنەن اڭعارامىز. «جاندارى جارلى بالاسى قالدى» اقىنداردان بولەك ەل تۇرعىندارى دا ءتىلسىز جاۋدى جىرعا قوسىپ، قايعىسىن ولەڭمەن جەتكىزۋدە. سونىڭ ءبىرى يسگۇل ەرباەۆا. دالامنىڭ ءتوسىن جايلاعان ءورت، قاراعايلاردى جايپاعان ءورت، جاندارىن مىناۋ شىرقىراتىپ، باتىرلارىمدى جالماعان ءورت. بالاسىن جوقتاپ انالار قالدى، جارتىسىن جوقتاپ جارلارى قالدى، اكەسىن كۇتىپ جولىنا قاراپ، جاندارى جارلى بالاسى قالدى. ينستاگرام جەلىسىندە اۆتورى رامازانوۆ دەپ كورسەتىلگەن «سەمەي ورمانى»  دەپ اتالاتىن قازا تاپقانداردىڭ رۋحىنا باعىشتالعان ورىس تىلىندەگى ولەڭ جاريالاندى.  

مەرەي مىرزاعاليقىزى