El shyǵysynan tıgen órt qoǵamdy beı-jaı qaldyrmady. Eriktiler qol ushyn sozýǵa attanyp, qalyń el qolynda barymen bólisýge tyrysyp jatyr. Jalpyulttyq Aza kúni jarııalanyp, halyqty jumyldyrýǵa talpynys baıqalady. Aqyndar, jalpy osy oqıǵaǵa qatardaı jaı retinde qaraı almaıtyn adamdar kóńil, yqylasyn óleńmen de bildirgen.
Abaı oblysyndaǵy alapat órtti aýyzdyqtaý úshin múmkin bolǵan tehnıkanyń bári jumyldyrylyp otyr. Odan bólek, tilsiz jaýdyń saldarynan zardap shekken Semeıge elimizdiń ár aımaǵynan kómek kórsetilýde. Áleýmettik jelilerde halyqtan aqsha jınap, qol ushyn sozyp jatqan belsendiler de jeterlik. Qarjylaı kómekten bólek rýhanı azyq berip, halyqqa sózderimen demeý bolyp, eldi birlikke shaqyrǵan aqyndar da barshylyq.
«ShARASYZ JATYR KÚIIP JANYM MENIŃ»
Parlament májilisiniń depýtaty, aıtysker aqyn Rınat Zaıtov týǵan jerin bylaı dep jyrǵa qosty:
Semeıim — syrly qalam, bıik tórim.
Týystarym, dostarym, súıikti elim.
Tilsiz jaýdy jeńe almaı saǵan tıgen
Sharasyz jatyr janym kúıip meniń...
Aqyn jerlesterin osyndaı qıyn-qystaý kúnde synbaı, birlikte bolýǵa shaqyrady:
Aıtarym barsha týys, bar dosyma
Birlik kerek, jaý kelse el qasyna.
Rýhyń syna kórmesin, semeılikter
Aǵaıyn, sen qulama, sen jasyma!
«QANDAI JOQTAÝ AITAIYN ERIM ÚShIN?!.»
Daryn jastar syılyǵynyń laýreaty, aıtysker aqyn Sara Toqtamysova da óziniń ınstagram paraqshasynda Semeılikterdi qoldaýǵa arnalǵan óleń joldaryn jarııa etti.
Semeıim, júregimniń bóligisiń,
Qazaqqa bólip bergen kóp yrysyn.
Qanatymen sý sepken qarlyǵashtaı
Qandaı sóz tapsam eken elim úshin?
Sharasyzdan sharq urǵan shaǵaladaı,
Nendeı kómek bere alam jerim úshin?
Bozdalada shyryldap boztorǵaıdaı
Qandaı joqtaý aıtaıyn erim úshin?
Azamatyn joqtaǵan analardyń
Kórý qıyn kóz jas pen kórinisin...
Alladan járdem suraǵan Sara Toqtamysova jańbyrmen barlyq aýyrtpalyqtyń jańa oblystan ketýin tileıdi.
«SEP BOLAR MA EKEN KÓZ JASYŃ...»
Qaza tapqandardyń jaqyndarymen kezdesý barysynda kózine jas alǵan Ekologııa mınıstri Zúlfııa Súleımenovanyń vıdeosy keńinen tarady. Osyǵan baılanysty aqyn Tóreǵalı Táshenov óziniń feısbýk paraqshasynda «O, Zúlfııa, Zúlfııa» óleńimen bólisti.
Aqyn óleńinde el basqarý jaýapkershiligin moıynǵa alǵandardy
Bıligiń otyr myńqııa,
Shirengen óńsheń shyrtııa, - dep synaıdy.
Únsiz egilip jylaǵan mınıstrge myna óleń joldaryn arnady:
Jylaı tús, shyńǵyr, shyrqyra!
Sep bolar ma eken kóz jasyń,
Qara ormanyń —
Ultyńa!...
«TAǴY IZDEŃDERShI...»
Aıtys aqyny ári jýrnalıst Bekjan Áshirbaev ta elimizdiń basyna túsken jaıdy jyryna arqaý etti. «Ot bıi» dep atalatyn óleń órt sóndirýshilerdiń órligine arnalǵan:
Bozdaq bop ketti bota jasynda,
Úreıli kóńil—aqbóken.
Taǵy izdeńdershi ot arasynda
Adasyp júrgen joq pa eken?.. degen joldary oqyǵan jannyń júregin tebirentpeı qoımasy anyq. Qyzmetin atqaryp júrip qaza tapqan búgingi kúnniń batyrlaryna degen qurmetin «orman qorǵady perishtesindeı, peıishten bolǵaı mekeni!» degen sózderinen ańǵaramyz.
«JANDARY JARLY BALASY QALDY»
Aqyndardan bólek el turǵyndary da tilsiz jaýdy jyrǵa qosyp, qaıǵysyn óleńmen jetkizýde. Sonyń biri Isgúl Erbaeva.
Dalamnyń tósin jaılaǵan órt,
Qaraǵaılardy jaıpaǵan órt,
Jandaryn mynaý shyrqyratyp,
Batyrlarymdy jalmaǵan órt.
Balasyn joqtap analar qaldy,
Jartysyn joqtap jarlary qaldy,
Ákesin kútip jolyna qarap,
Jandary jarly balasy qaldy.
Instagram jelisinde avtory Ramazanov dep kórsetilgen «Semeı ormany» dep atalatyn qaza tapqandardyń rýhyna baǵyshtalǵan orys tilindegi óleń jarııalandy.
Mereı Myrzaǵalıqyzy
