باعدارشامنىڭ قىزىل تۇسىنە ءوتىپ كەتكەن. جول اپاتىنا كىنالى انىقتالدى

الماتىدا 2022 جىلدىڭ 8 قاراشاسىندا ابىلاي حان مەن تولە بي كوشەلەرىنىڭ قيىلىسىندا ەكى اۆتوبۋس سوعىسىپ، ادام شىعىنىنا اكەلگەن ەدى. جول اپاتىنا №98 اۆتوبۋس جۇرگىزۋشىسى كىنالى دەپ تانىلدى، دەپ حابارلايدى “ادىرنا”. المالى اۋداندىق سوتىنىڭ ءباسپاسوز مالىمدەمەسىندە: «الماتى قالاسى المالى اۋداندىق سوتىندا قازاقستان رەسپۋبليكاسى قىلمىستىق كودەكسىنىڭ 345-بابى 3-بولىگى (جابىرلەنۋشىنىڭ ولىمىنە اكەپ سوققان جول قوزعالىسى ەرەجەلەرىن بۇزۋ) بويىنشا سوتقا جىبەرىلگەن ا.-عا قاتىستى قىلمىستىق ءىس قارالدى. سوت سوتتالۋشى ا.-نى قىلمىستىق كودەكستىڭ 345-بابىنىڭ 3-بولىگىمەن كىنالى دەپ تانىپ، وعان 2 جىل 6 ايعا باس بوستاندىعىنان ايىرۋ جازاسى جانە قوسىمشا 5 جىل مەرزىمگە كولىك قۇرالىن باسقارۋ قۇقىعىنان ايىرۋ تۇرىندە جازا تاعايىندادى»، - دەلىنگەن. اۆتوبۋس جۇرگىزۋشىسى كىناسىن مويىنداماي، اقتالۋدى سۇرادى. سوت اسىراۋىندا ءۇش كىشكەنتاي بالانىڭ بولۋىنا بايلانىستى جازانى جەڭىلدەتۋ تۋرالى شەشىم قابىلداعان. «ش. جانە ك.-نىڭ پايداسىنا مورالدىق شىعىن رەتىندە ارقايسىسى 2 ميلليون تەڭگە، ش.-نىڭ پايداسىنا 323 885 تەڭگە ماتەريالدىق شىعىن ءوندىرىلدى»، - دەپ حابارلادى سوت. بۇل جول اپاتى وتكەن جىلدىڭ 8 قاراشاسىندا ابىلاي حان مەن تولە بي كوشەلەرىنىڭ قيىلىسىندا بولعان ەدى.  №98 جانە №201 اۆتوبۋستار سوقتىعىسقان. سوت انىقتاعانداي،№98 اۆتوبۋستىڭ جۇرگىزۋشىسى ابىلاي حان كوشەسىنىڭ بويىمەن وڭتۇستىك باعىتتا كەلە جاتىپ، جول قوزعالىسى ەرەجەلەرىن ەلەمەي، باعدارشامنىڭ تىيىم سالىنعان قىزىل تۇسىنە ءوتىپ كەتىپ، №201 اۆتوبۋسپەن سوقتىعىسقان.