وبەكستاندا كوپ ايەل الۋدى ناسيحاتتاۋعا جانە ايەلدەر مەن ەرلەردىڭ تەڭدىگىن جوققا شىعارۋعا تىيىم سالاتىن زاڭ ماقۇلداندى، دەپ حابارلايدى "ادىرنا" گازەتا.uz باسىلىمىنا سىلتەمە جاساپ.
وزبەكستان سەناتى 45-ءشى جالپى وتىرىسىندا قىلمىستىق جانە اكىمشىلىك كودەكستەرگە نەكەنى تىركەمەۋ، كوپ ايەل الۋدى ناسيحاتتاۋ، سونداي-اق قوعامدىق ورىنداردا جەكە باسىن انىقتاۋعا مۇمكىندىك بەرمەيتىن دارەجەدە بەتىن جاۋىپ جۇرگەنى ءۇشىن جازانى كوزدەيتىن تۇزەتۋلەر مەن تولىقتىرۋلار ەنگىزۋ تۋرالى زاڭدى ماقۇلدادى.
جاڭا زاڭ ازاماتتاردىڭ ۇلتتىق، ناسىلدىك، ەتنيكالىق نەمەسە ءدىني بەلگىلەرى بويىنشا ارتىقشىلىعىن نەمەسە كەمشىلىگىن ناسيحاتتاعانى، سونداي-اق نەكە زاڭدا بەلگىلەنگەن تارتىپپەن تىركەلمەگەن ادامدار اراسىندا ءدىني نەكە قيۋ ءراسىمىن جاساعانى ءۇشىن اكىمشىلىك جانە قىلمىستىق جازالاردى بەلگىلەيدى.
سەنات بايانداماسىندا سوڭعى ۋاقىتتا وزبەكستاندا ءدىني نەكەلەردىڭ سانى ارتىپ، كوپ ايەل الۋ فاكتىلەرى ورىن الىپ جاتقانى ايتىلدى.
«كوپ ايەل الۋدى ناسيحاتتاۋ جانە ونىڭ «پايداسى» جارناما، ويىن-ساۋىق جانە اناليتيكالىق ماتەريالدار ارقىلى دا تارالۋدا. سونىڭ سالدارىنان نەكەسىز تۋىلعان بالالاردىڭ سانى دا كوبەيىپ كەتتى»،- دەپ ايتىلدى سەنات وتىرىسىندا.
ستاتيستيكالىق مالىمەتتەرگە سايكەس، 2020 جىلى وزبەكستاندا جالعىزباستى انالار 16 564 بالانى ومىرگە اكەلسە، 2022 جىلى بۇل كورسەتكىش 18 955 بالاعا جەتكەن.
"تۇزەتۋلەر "وزبەكستان حالقىنىڭ عاسىرلار بويعى تاريحى مەن مادەني داستۇرلەرىن ەسكەرە وتىرىپ" ازىرلەندى",-دەپ اتاپ كورسەتىلگەن سەنات حابارلاماسىندا.
ەستەرىڭىزگە سالا كەتەيىك، زاڭ شىعارۋ پالاتاسى بۇل زاڭدى 5 قىركۇيەكتە قابىلداعان بولاتىن. تۇزەتۋلەردىڭ كۇشىنە ەنۋى ءۇشىن زاڭعا وزبەكستان پرەزيدەنتى شاۆكات ميرزەەۆ قول قويۋى كەرەك.
