Óbekstanda kóp áıel alýdy nasıhattaýǵa jáne áıelder men erlerdiń teńdigin joqqa shyǵarýǵa tyıym salatyn zań maquldandy, dep habarlaıdy "Adyrna" Gazeta.uz basylymyna silteme jasap.
Ózbekstan Senaty 45-shi jalpy otyrysynda Qylmystyq jáne Ákimshilik kodeksterge nekeni tirkemeý, kóp áıel alýdy nasıhattaý, sondaı-aq qoǵamdyq oryndarda jeke basyn anyqtaýǵa múmkindik bermeıtin dárejede betin jaýyp júrgeni úshin jazany kózdeıtin túzetýler men tolyqtyrýlar engizý týraly zańdy maquldady.
Jańa zań azamattardyń ulttyq, násildik, etnıkalyq nemese dinı belgileri boıynsha artyqshylyǵyn nemese kemshiligin nasıhattaǵany, sondaı-aq neke zańda belgilengen tártippen tirkelmegen adamdar arasynda dinı neke qııý rásimin jasaǵany úshin ákimshilik jáne qylmystyq jazalardy belgileıdi.
Senat baıandamasynda sońǵy ýaqytta Ózbekstanda dinı nekelerdiń sany artyp, kóp áıel alý faktileri oryn alyp jatqany aıtyldy.
«Kóp áıel alýdy nasıhattaý jáne onyń «paıdasy» jarnama, oıyn-saýyq jáne analıtıkalyq materıaldar arqyly da taralýda. Sonyń saldarynan nekesiz týylǵan balalardyń sany da kóbeıip ketti»,- dep aıtyldy Senat otyrysynda.
Statıstıkalyq málimetterge sáıkes, 2020 jyly Ózbekstanda jalǵyzbasty analar 16 564 balany ómirge ákelse, 2022 jyly bul kórsetkish 18 955 balaǵa jetken.
"Túzetýler "Ózbekstan halqynyń ǵasyrlar boıǵy tarıhy men mádenı dástúrlerin eskere otyryp" ázirlendi",-dep atap kórsetilgen Senat habarlamasynda.
Esterińizge sala keteıik, zań shyǵarý palatasy bul zańdy 5 qyrkúıekte qabyldaǵan bolatyn. Túzetýlerdiń kúshine enýi úshin zańǵa Ózbekstan prezıdenti Shavkat Mırzeev qol qoıýy kerek.
