قازاقستان مەن قىتاي اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم 2023 جىلدىڭ 10 قاراشاسىنان باستاپ كۇشىنە ەنەدى. بۇل تۋرالى سىرتقى ىستەر مينيسترلىگى ايتتى، دەپ حابارلايدى «ادىرنا» ءتىلشىسى.
«قۇجاتقا سايكەس، ۆيزا يەلەرى جەكە ىستەردى، ءتۋريزمدى، ەم قابىلداۋدى، حالىقارالىق تاسىمالداردى، ترانزيتتىك، سونداي-اق ىسكەرلىك ماقساتتاردى (كەلىسىمشارتتار جاساسۋ، كەلىسسوزدەر جۇرگىزۋ، كونسۋلتاتسيالىق قىزمەتتەر كورسەتۋ جانە باسقا دا ىسكەرلىك ماقساتتار) جۇزەگە اسىرۋ ماقساتىمەن ەكىنشى ۋاعدالاسۋشى تاراپ مەملەكەتىنىڭ اۋماعىنا مەملەكەتتىك شەكارانى كەسىپ وتكەن ساتتەن باستاپ كۇنتىزبەلىك 30 (وتىز) كۇننەن اسپايتىن مەرزىمگە، كۇنتىزبەلىك 180 ء(جۇز سەكسەن) كۇن ىشىندە جيىنتىعىندا كۇنتىزبەلىك 90 (توقسان) كۇننەن اسپايتىن ءبىر مارتە نەمەسە كوپ مارتە كەلۋ، كەتۋ، ۋاقىتشا بولۋ ءۇشىن ۆيزالىق تالاپتاردان بوساتىلادى»،— دەلىنگەن حابارلامادا.
ەسكە سالايىق، بۇعان دەيىن تايلاند بيلىگى قازاقستاندىقتاردىڭ 30 كۇن بويى ەلدە ۆيزاسىز ءجۇرۋىن ماقۇلداعان ەدى.
وسى قارساڭدا قازاقستان پرەزيدەنتى قاسىم-جومارت توقاەۆ قىتايعا رەسمي ساپارمەن بارعان. ول پەكيندە «ءبىر بەلدەۋ، ءبىر جول» حالىقارالىق ىنتىماقتاستىق فورۋمىنىڭ ءۇشىنشى وتىرىسىنا قاتىسىپ، بايانداما جاساعان. پرەزيدەنت قاسىم-جومارت توقاەۆ پەكيننەن قايتارىندا ءۇرىمجى قالاسىندا بولىپ، قكپ وك ساياسي بيۋروسىنىڭ مۇشەسى، قحر شىڭجاڭ-ۇيعىر اۆتونوميالىق اۋدانى پارتيا كوميتەتىنىڭ حاتشىسى ما سينجۋيمەن كەزدەسكەن.
