Qazaqstan men Qytaı arasyndaǵy vızalyq talaptardan ózara bosatý týraly kelisim 2023 jyldyń 10 qarashasynan bastap kúshine enedi. Bul týraly Syrtqy ister mınıstrligi aıtty, dep habarlaıdy «Adyrna» tilshisi.
«Qujatqa sáıkes, vıza ıeleri jeke isterdi, týrızmdi, em qabyldaýdy, halyqaralyq tasymaldardy, tranzıttik, sondaı-aq iskerlik maqsattardy (kelisimsharttar jasasý, kelissózder júrgizý, konsýltaııalyq qyzmetter kórsetý jáne basqa da iskerlik maqsattar) júzege asyrý maqsatymen ekinshi Ýaǵdalasýshy Tarap memleketiniń aýmaǵyna Memlekettik shekarany kesip ótken sátten bastap kúntizbelik 30 (otyz) kúnnen aspaıtyn merzimge, kúntizbelik 180 (júz seksen) kún ishinde jıyntyǵynda kúntizbelik 90 (toqsan) kúnnen aspaıtyn bir márte nemese kóp márte kelý, ketý, ýaqytsha bolý úshin vızalyq talaptardan bosatylady»,— delingen habarlamada.
Eske salaıyq, buǵan deıin Taıland bıligi qazaqstandyqtardyń 30 kún boıy elde vızasyz júrýin maquldaǵan edi.
Osy qarsańda Qazaqstan Prezıdenti Qasym-Jomart Toqaev Qytaıǵa resmı saparmen barǵan. Ol Pekınde «Bir beldeý, bir jol» halyqaralyq yntymaqtastyq forýmynyń úshinshi otyrysyna qatysyp, baıandama jasaǵan. Prezıdent Qasym-Jomart Toqaev Pekınnen qaıtarynda Úrimji qalasynda bolyp, QKP OK Saıası bıýrosynyń múshesi, QHR Shyńjań-Uıǵyr avtonomııalyq aýdany partııa komıtetiniń hatshysy Ma Sınjýımen kezdesken.
