رەسپۋبليكا كۇنى قارساڭىندا، جەزقازعان قالاسى اكىمدىگىنىڭ ۇيىمداستىرۋىمەن العاش رەت ۇلتتىق سپورت تۇرلەرىنەن فەستيۆال ءوتتى. 200-دەن استام ادام 8 سپورت تۇرىنەن سايىسقا ءتۇستى، دەپ حابارلايدى "ادىرنا" ءتىلشىسى جەزقازعان قالاسى اكىمدىگىنىڭ ءباسپاسوز قىزمەتىنە سىلتەپ.
ءىس-شارانى اشقان قالا باسشىسى قايرات شايجانوۆ جەزقازعاندا ۇلتتىق سپورت تۇرلەرى اكىمدىك قولداۋىمەن قارقىندى دامىپ كەلە جاتقانىن اتاپ ءوتتى. «العاشقى فەستيۆالدىڭ ماقساتى - ءتول مادەنيەتىمىزدى دارىپتەپ، ۇلتتىق سپورتتى دامىتۋ ۇلتتىق سپورت تۇرلەرى – بۇل ءبىزدىڭ تاريحىمىزدىڭ جانە قازاق حالقىنىڭ وزىندىك ەرەكشەلىگىنىڭ ايناسى. بۇگىنگى جارىسقا قاتىسۋعا ۇلىتاۋ وبلىسىنان ەڭ مىقتى سپورتشىلارىمىز جينالدى. جەڭىسكە لايىقتىلار جەڭەدى دەپ سەنەمىز. ۇلتتىق سپورت تۇرلەرىنەن فەستيۆالدى كەلەسى جىلى قالامىزدىڭ 70 جىلدىق مەرەيتويىندا رەسپۋبليكالىق دەڭگەيدە وتكىزۋ جوسپارلانۋدا»، – دەدى قايرات شايجانوۆ.
فەستيۆالدە جەزقازعان، ساتباەۆ، قاراجال قالالارىنان، جاڭاارقا، ۇلىتاۋ اۋدانىنان سپورتشىلار كوكپار، اسىق اتۋ، توعىزقۇمالاق، ساداق اتۋ، اۋدارىسپاق، تەڭگە ءىلۋ، ارقان تارتىس، قازاق كۇرەسى سياقتى ۇلتتىق ويىن تۇرلەرىنەن كۇش سىناستى.
جارىستىڭ جالپى جۇلدە قورى - 6 ملن 800 مىڭ تەڭگە. ءىس-شارا قوناقتارى مەن قاتىسۋشىلارى جەرگىلىكتى ونەرپازدار مەن ارنايى شاقىرىلعان ەسترادا جۇلدىزى ۇشقىن جامالبەكتىڭ ونەرىن تاماشالاپ، ارنايى تىگىلگەن كيىز ۇيلەردە ۇلتتىق تاعامداردان ءدام تاتتى.
سپورت تۇرلەرىنەن جەڭىمپازدار مەن جۇلدەگەرلەر ماقتاۋ قاعازدارىمەن، مەدالدارمەن جانە باعالى سىيلىقتارمەن ماراپاتتالدى.
كوكپار ويىنىنان:
I ورىن - جاڭاارقا اۋدانى كومانداسى 1 000 000 تگ II ورىن - قاراجال قالاسى كومانداسى 500 000 تگ III ورىن - جەزقازعان قالاسى كومانداسى، بايدالى بي كومانداسى 300 000 تگ يەلەندى.
