اقمولا وبلىسى جاقسى اۋدانى، جاقسى اۋىلى اكىمدىگى تۇسىنىكسىز تەندەر جاريالادى، - دەپ حابارلايدى ادىرنا ۇلتتىق پورتالى satypalu سايتىنا سىلتەمە جاساپ.
29 قاراشا كۇنى اتالعان اۋىلدىڭ اكىمدىگى «اقمولا وبلىسى جاقسى اۋدانى جاقسى اۋىلىندا كوشەلەردى جارىقتاندىرۋ ءۇشىن تىرەكتەردى جالعا بەرۋ بويىنشا قىزمەتتەر» دەگەن تەندەر جاريالاعان. تەندەردىڭ قۇنى 1 513 350 تەڭگەگە باعالانعان.
«ساتىپ الۋ ءپانى تۋرالى جالپى مالىمەتتەر» دەگەن اتاۋمەن بەرىلگەن تەحنيكالىق سيپاتتامانى ءتۇسىنۋ مۇمكىن ەمەس. «ساتىپ الۋ نىساناسى اقمولا وبلىسى جاقسى كەنتىنىڭ كوشەلەرىن جارىقتاندىرۋ قۇرىلعىلارى ورناتىلعان جاقسى اۋىلىنىڭ كوشەلەرىن جارىقتاندىرۋ باعاندارىن جالعا بەرۋ قىزمەتتەرى بولىپ تابىلادى» دەگەن جارىمجان سويلەمنەن اكىمدىك اۋىل كوشەلەرىن جارىقتاندىرۋ ءۇشىن ورناتىلاتىن باعانداردى جالعا العالى وتىرعانىن اڭعارۋعا بولادى.
سونداي-اق، تەحنيكالىق سيپاتتامادان جالعا العان باعانداردىڭ سانى – 531 دانا بولۋى كەرەكتىگىن، باعان ماتەريالى تەمىربەتوننان جاسالۋى ءتيىس ەكەنىن، كوشەلەردى جارىقتاندىرۋدى قامتاماسىز ەتۋ ءۇشىن باعاندارعا اۋە كابەلدىك جەلىلەرى مەن شامداردىڭ ءىلىنىپ تۇراتىنىن، جالعا بەرۋشى باعانداردىڭ زاڭدى يەسى بولىپ، ولار قيسايعان جاعدايدا ۋاقىتىلى جوندەپ تۇرۋى كەرەكتىگىن ۇقتىق.
جالداۋ مەرزىمى 2024 جىلعى قاڭتاردان جەلتوقسانعا دەيىن (اي سايىن) دەپ كورسەتىلگەن.
اۋىل كوشەلەرىن جارىقتاندىرۋعا ەشكىمنىڭ قارسىلىعى جوق. دەسە دە، كوشە شامدارى ورناتىلعان باعانداردى اي سايىن جالعا الىپ تۇرۋ قانشالىقتى زاڭدى دۇنيە؟ سوندا مەملەكەتتىك ساتىپ الۋدىڭ جەڭىمپازى 531 دانا باعانىن اي سايىن 1 513 350 تەڭگەگە جالعا بەرىپ وتىرا ما؟ باعانداردىڭ ءبىر جىلدىق جالداۋ قۇنىنا كەتەتىن 18 160 200 تەڭگەمەن سول تىرەكتەردى ءبىرجولا ساتىپ الۋعا بولماس پا ەدى؟ اقمولا وبلىسىنىڭ شەندىلەرى 2025-26-27 جىلدارعا ءار جىل سايىن قايتادان تەندەر جاريالاپ وتىرماق پا؟ جوق، الدە ولار اۋىل كوشەسىن ءبىر جىل عانا جارىقتاندىرۋدى جوسپارلاپ وتىر ما؟
سىزگە اقمولالىقتار كوشە شامدارىنا ورناتىلاتىن باعانداردى جالعا الۋ دەگەن جاڭا «know how» بيزنەستىڭ جوباسىن ويلاپ تاپقانداي كورىنبەي مە؟ بۇل سۇراقتاردى ءتيىستى مەكەمەلەرگە جولدادىق!
قانات بىرلىكۇلى
ادىرنا ۇلتتىق پورتالى
