Aqmola oblysy Jaqsy audany, Jaqsy auyly äkımdıgı tüsınıksız tender jariialady, - dep habarlaidy Adyrna ūlttyq portaly satypalu saityna sılteme jasap.
29 qaraşa künı atalǧan auyldyŋ äkımdıgı «Aqmola oblysy Jaqsy audany Jaqsy auylynda köşelerdı jaryqtandyru üşın tırekterdı jalǧa beru boiynşa qyzmetter» degen tender jariialaǧan. Tenderdıŋ qūny 1 513 350 teŋgege baǧalanǧan.
«Satyp alu pänı turaly jalpy mälımetter» degen ataumen berılgen tehnikalyq sipattamany tüsınu mümkın emes. «Satyp alu nysanasy Aqmola oblysy Jaqsy kentınıŋ köşelerın jaryqtandyru qūrylǧylary ornatylǧan Jaqsy auylynyŋ köşelerın jaryqtandyru baǧandaryn jalǧa beru qyzmetterı bolyp tabylady» degen jarymjan söilemnen äkımdık auyl köşelerın jaryqtandyru üşın ornatylatyn baǧandardy jalǧa alǧaly otyrǧanyn aŋǧaruǧa bolady.
Sondai-aq, tehnikalyq sipattamadan jalǧa alǧan baǧandardyŋ sany – 531 dana boluy kerektıgın, baǧan materialy temırbetonnan jasaluy tiıs ekenın, köşelerdı jaryqtandyrudy qamtamasyz etu üşın baǧandarǧa äue kabeldık jelılerı men şamdardyŋ ılınıp tūratynyn, jalǧa beruşı baǧandardyŋ zaŋdy iesı bolyp, olar qisaiǧan jaǧdaida uaqytyly jöndep tūruy kerektıgın ūqtyq.
Jaldau merzımı 2024 jylǧy qaŋtardan jeltoqsanǧa deiın (ai saiyn) dep körsetılgen.
Auyl köşelerın jaryqtandyruǧa eşkımnıŋ qarsylyǧy joq. Dese de, köşe şamdary ornatylǧan baǧandardy ai saiyn jalǧa alyp tūru qanşalyqty zaŋdy dünie? Sonda memlekettık satyp aludyŋ jeŋımpazy 531 dana baǧanyn ai saiyn 1 513 350 teŋgege jalǧa berıp otyra ma? Baǧandardyŋ bır jyldyq jaldau qūnyna ketetın 18 160 200 teŋgemen sol tırekterdı bırjola satyp aluǧa bolmas pa edı? Aqmola oblysynyŋ şendılerı 2025-26-27 jyldarǧa är jyl saiyn qaitadan tender jariialap otyrmaq pa? Joq, älde olar auyl köşesın bır jyl ǧana jaryqtandyrudy josparlap otyr ma?
Sızge aqmolalyqtar köşe şamdaryna ornatylatyn baǧandardy jalǧa alu degen jaŋa «know how» biznestıŋ jobasyn oilap tapqandai körınbei me? Būl sūraqtardy tiıstı mekemelerge joldadyq!
Qanat Bırlıkūly Adyrna ūlttyq portaly
Ūqsas jaŋalyqtar
