اقمولادا جىلقى جانۋارى ارام ءولىپ جاتىر، دەپ حابارلايدى "ادىرنا" ءتىلىشسى قازاقپاراتقا سىلتەپ.
وبلىس تۇرعىندارى مالىنا الاڭداپ، توتەنشە جاعداي جاريالاۋدى سۇراپ وتىر.
الەۋمەتتىك جەلىدە ءبىرجان سال، بۋراباي جانە زەرەندى اۋداندارىندا جىلقى مالىنىڭ قىرىلعان ۆيدەوسى تاراۋدا. ودان بولەك اقكول، استراحان، اتباسار اۋداندارىندا دا ارام ولگەن جىلقى كوپ.
جىلقىشىلار اۋا رايىنىڭ اسەرىنەن مالدىڭ قىرىلۋى ورىن العانىن ايتادى.
سەبەبى جازدا قۇرعاشىلىقتان ءشوپ بوي سالىپ، وسپەي قالعان. وڭىردە كۇز مەزگىلىندە جاڭبىردان ەگىن كوكتەپ، قانشاما استىق ىسىراپ بولىپتى.
ال جەلتوقسان ايىندا جاۋعان جاڭبىردان كەيىن جايىلىمدا مۇز قاتىپ، قالىڭ قار تۇسكەن. سالدارىنان تەبىندەپ جۇرگەن جىلقى ازىق تابا الاماي، كوتەرەم بولىپ، ارام ءولىپ جاتقان كورىنەدى. ۇلگى اۋىلىنىڭ جىلقىشىسى:
«ۇزاق جىلعى تاجىريبەمدە مۇنداي سۇمدىقتى ءبىرىنشى رەت كورىپ وتىرمىن. بۇل جۇت ەمەي نەمەنە؟! جايلىمنىڭ بارلىعى جەكەمەنىشىككە ءوتىپ كەتكەندىكتەن مال ۇستاعان شارۋعا جىلقىسىن قاماپ باعۋعا تۋرا كەلدى. سول سەبەپتى، قوڭىر كۇزگە دەيىن جىلىگىنە ماي بىتپەي، قىسقا جۇدەۋ ءتۇستى. ەندى مىنە، قىستىڭ قاھارىنا شىداي الماي ارام ولۋدە. بىزدە 45 جاباعى ارام ءولدى. كورشى اۋىلداردا قىرىلعان جىلقى سانى 100-دەن اسادى. قار ەرىگەنشە ءالى ەكى اي بار. وعان دەيىن قالعان جىلقىمىزدان ايىرىلىپ، قۇرىق ۇستاپ قالماساق ەكەن»، - دەپ الاڭدايدى امانتاي دۇكەنوۆ.
اقمولا وبلىسىنىڭ ۆەتەريناريا باسقارماسى باسشىسى دا قاسيەتتى جانۋاردىڭ ىندەتتەن ەمەس، اشتىقتان ءولىپ وتىرعانىن ايتقان.
ال وبلىستىق اۋىل شارۋاشىلىعى جانە جەر قاتىناستارى باسقارماسى باسشىسىنىڭ ورىنباسارى قاسىم يتقۇسوۆ دابىل قاققان شارۋالارعا كومەك كورسەتىلىپ جاتقانىن ايتادى.
«ءبىرجان سال، بۋراباي، زەرەندى، اقكول، استراحان جانە اتباسار اۋدانداردىڭ تۇرعىندارىنان تەبىندە جۇرگەن جىلقىلاردىڭ ازىق تابا الماي، قولعا ۇستاپ جاتقانى تۋرالى حابارلامالار كەلدى. جاعدايدى باقىلاپ وتىرمىز. زەرەندى اۋدانىنىڭ اكىمدىگى كەيبىر اۋىلدارعا سابان، ديزەل وتىنىڭ جەتكىزىپ، بەرىپ جاتىر. سونداي-اق قازىر ءبىز اعاش باۋرايلارىندا قاتىپ قالعان قاردى كۇرەپ جاتىرمىز»، - دەيدى قاسىم يتقۇسوۆ.
