Aqmolada jylqy janýary aram ólip jatyr, dep habarlaıdy "Adyrna" tilishsi Qazaqparatqa siltep.
Oblys turǵyndary malyna alańdap, tótenshe jaǵdaı jarııalaýdy surap otyr.
Áleýmettik jelide Birjan sal, Býrabaı jáne Zerendi aýdandarynda jylqy malynyń qyrylǵan vıdeosy taraýda. Odan bólek Aqkól, Astrahan, Atbasar aýdandarynda da aram ólgen jylqy kóp.
Jylqyshylar aýa raıynyń áserinen maldyń qyrylýy oryn alǵanyn aıtady.
Sebebi jazda qurǵashylyqtan shóp boı salyp, óspeı qalǵan. Óńirde kúz mezgilinde jańbyrdan egin kóktep, qanshama astyq ysyrap bolypty.
Al jeltoqsan aıynda jaýǵan jańbyrdan keıin jaıylymda muz qatyp, qalyń qar túsken. Saldarynan tebindep júrgen jylqy azyq taba alamaı, kóterem bolyp, aram ólip jatqan kórinedi. Úlgi aýylynyń jylqyshysy:
«Uzaq jylǵy tájirıbemde mundaı sumdyqty birinshi ret kórip otyrmyn. Bul jut emeı nemene?! Jaılymnyń barlyǵy jekemenishikke ótip ketkendikten mal ustaǵan sharýǵa jylqysyn qamap baǵýǵa týra keldi. Sol sebepti, qońyr kúzge deıin jiligine maı bitpeı, qysqa júdeý tústi. Endi mine, qystyń qaharyna shydaı almaı aram ólýde. Bizde 45 jabaǵy aram óldi. Kórshi aýyldarda qyrylǵan jylqy sany 100-den asady. Qar erigenshe áli eki aı bar. Oǵan deıin qalǵan jylqymyzdan aıyrylyp, quryq ustap qalmasaq eken», - dep alańdaıdy Amantaı Dúkenov.
Aqmola oblysynyń veterınarııa basqarmasy basshysy da qasıetti janýardyń indetten emes, ashtyqtan ólip otyrǵanyn aıtqan.
Al oblystyq aýyl sharýashylyǵy jáne jer qatynastary basqarmasy basshysynyń orynbasary Qasym Itqusov dabyl qaqqan sharýalarǵa kómek kórsetilip jatqanyn aıtady.
«Birjan sal, Býrabaı, Zerendi, Aqkól, Astrahan jáne Atbasar aýdandardyń turǵyndarynan tebinde júrgen jylqylardyń azyq taba almaı, qolǵa ustap jatqany týraly habarlamalar keldi. Jaǵdaıdy baqylap otyrmyz. Zerendi aýdanynyń ákimdigi keıbir aýyldarǵa saban, dızel otynyń jetkizip, berip jatyr. Sondaı-aq qazir biz aǵash baýraılarynda qatyp qalǵan qardy kúrep jatyrmyz», - deıdi Qasym Itqusov.
