پارلامەنت ءماجىلىسىنىڭ توراعاسى ەرلان قوشانوۆ وتباسىنداعى ەرلەردىڭ تولىق ۇستەمدىگىن "بۇرمالانعان يدەيا" دەپ اتاپ، وتباسىداعى زورلىق-زومبىلىق تۋرالى ايتتى، دەپ حابارلايدى «ادىرنا» ۇلتتىق پورتالى.
«وتباسىنداعى ەرلەردىڭ تولىق ۇستەمدىگى تۋرالى بۇرمالانعان يدەيا وتكەننىڭ ەنشىسىندە قالۋى كەرەك. مەكتەپ قابىرعاسىنان باستاپ جاس ۇرپاقتىڭ ساناسىنا دۇرىس قۇندىلىقتاردى ءسىڭىرىپ، حالىق اراسىندا قۇقىقتىق مادەنيەتتى قالىپتاستىرۋ قاجەت»، - دەدى ەرلان قوشانوۆ ورتالىق ازيا ەلدەرىنىڭ ايەلدەر ديالوگى حالىقارالىق كونفەرەنتسياسىندا.
توراعا قوشانوۆ گەندەرلىك زورلىق-زومبىلىقپەن كۇرەسۋ ماڭىزدى ەكەنىن اتاپ ءوتتى. بۇل ماسەلە جاھاندىق سيپاتقا يە - الەمدەگى ءاربىر ءۇشىنشى ايەل فيزيكالىق نەمەسە جىنىستىق زورلىق-زومبىلىقتى باستان كەشىرەدى. الەمنىڭ 155 ەلىندە تۇرمىستىق زورلىق-زومبىلىققا قارسى زاڭ بار.
ءماجىلىس باسشىسىنىڭ ايتۋىنشا، دەپۋتاتتار وسى سالاداعى زاڭنامالىق تۇزەتۋلەردىڭ جاڭا پاكەتىن ءازىرلەۋگە كىرىستى.
تۇرمىستىق زورلىق-زومبىلىق ءۇشىن قىلمىستىق جاۋاپكەرشىلىككە تارتۋ جوسپارلانۋدا. زاڭ قابىلدانعان جاعدايدا دەنساۋلىققا اۋىرلىعى ورتاشا جانە اۋىر زيان كەلتىرگەنى ءۇشىن باس بوستاندىعىنان ايىرۋ قاراستىرىلىپ، باس بوستاندىعىن شەكتەۋ تولىعىمەن الىنىپ تاستالادى.
سونداي-اق «حاراسسمەنت» (سۇعاناقتىق) تۇسىنىگىن ەنگىزۋ جوسپارلانۋدا. قوشانوۆ ايەلدەردىڭ قۋدالاۋعا ءجيى ۇشىراي باستاعانىن، مۇنداي ارەكەتتەر ءۇشىن جازانى دا قاتايتۋ كەرەكتىگىن اتاپ ءوتتى.
«ادىرنا» ۇلتتىق پورتالى
