مەملەكەت باسشىسى قاسىم-جومارت توقاەۆ قازاقستان حالقىنا ۇندەۋ جولداپ، ولاردى حالىقارالىق ۆولونتەرلار كۇنىمەن قۇتتىقتادى، - دەپ حابارلايدى «ادىرنا» ۇلتتىق پورتالى.
«بۇگىن، حالىقارالىق ۆولونتەرلار كۇنىندە ءبىز باسقالارعا جانقيارلىقپەن كومەكتەسكەندەردى قۇرمەتتەيمىز. ءبىزدىڭ ۆولونتەرلار مەيىرىمدىلىك پەن قايىرىمدىلىق، ىنتىماق پەن ازاماتتىق جاۋاپكەرشىلىكتىڭ جوعارى يدەالدارىن بەينەلەيدى. بۇل ىرگەلى قۇندىلىقتار «ادال ازامات» تۇجىرىمداماسىنىڭ نەگىزىندە جاتىر. الەۋمەتتىك ماڭىزى بار ءىس-شارالارعا قاتىسىپ، قايىرىمدىلىق جوبالارىن جۇزەگە اسىرىپ، مۇقتاج جاندارعا قامقورلىق جاساپ جۇرگەندەردىڭ بارلىعىنا العىس ايتامىن. شىعارماشىلىق ءىس-ارەكەتتەرىڭىزدە شىنايى پاتريوتيزم كورىنەدى. مەملەكەت ەلدەگى ەرىكتىلەر قوزعالىسىنا قولداۋ كورسەتۋدى جالعاستىرادى»، - دەپ جازدى پرەزيدەنت ءوزىنىڭ X (Twitter) پاراقشاسىندا.
بۇۇ-نىڭ رەسمي سايتىندا حالىقارالىق ەرىكتىلەر كۇنىن بۇۇ باس اسسامبلەياسى بەكىتتى. ول جىل سايىن 5 جەلتوقساندا تويلانادى.
«بۇل كۇن ەرىكتىلەر مەن ۇيىمدار ءۇشىن ءوز جەتىستىكتەرىن اتاپ وتۋگە، يدەيالارمەن بولىسۋگە جانە جەرگىلىكتى قاۋىمداستىقتار، ۇكىمەتتىك ەمەس ۇيىمدار (ۇەۇ), بۇۇ اگەنتتىكتەرى، مەملەكەتتىك ورگاندار جانە جەكە سەكتور اراسىندا ءوز جۇمىسىن ىلگەرىلەتۋگە كومەكتەسەتىن بىرەگەي مۇمكىندىك»، - دەيدى بۇۇ.
بىرىككەن ۇلتتار ۇيىمىنىڭ مالىمەتى بويىنشا، 15 جانە ودان دا جوعارى جاستاعى ەرىكتىلەردىڭ اي سايىنعى سانى الەم بويىنشا 862,4 ميلليون ادامدى قۇرايدى. ۆولونتەرلىك جوبالاردىڭ كوپشىلىگى بەيرەسمي تۇردە ۇيىمداستىرىلعان — ولارعا الەم حالقىنىڭ 14,3 پايىزى قاتىسادى، ال ەڭبەككە قابىلەتتى جاستاعى ادامداردىڭ 6,5 پايىزى ۇيىمدار نەمەسە قاۋىمداستىقتار ارقىلى رەسمي ۆولونتەرلىك قىزمەتكە قاتىسادى.
رەسمي ەرىكتىلەر اراسىندا ەر ادامدار باسىم بولسا، بەيرەسمي ۆولونتەرلەر اراسىندا ايەلدەر ءجيى كەزدەسەدى. Qazvolunteer.kz پلاتفورماسىنداعى اقپاراتقا سايكەس، قازاقستاندا ۇلتتىق ۆولونتەرلىك جەلى 2010 جىلى قۇرىلعان. بۇل ازاماتتاردىڭ، ازاماتتىق قوعام ينستيتۋتتارىنىڭ، كاسىپكەرلىك سەكتوردىڭ جانە مەملەكەتتىك ورگانداردىڭ اراسىندا ۆولونتەرلىك قىزمەت مادەنيەتىن، ۆولونتەرلىك باستامالار مەن قىزمەتتى قالىپتاستىرۋ، قولداۋ جانە دامىتۋ ماقساتىندا ازاماتتار مەن زاڭدى تۇلعالاردىڭ ەرىكتى بىرلەستىگى.
«ادىرنا» ۇلتتىق پورتالى
