Memleket basshysy Qasym-Jomart Toqaev Qazaqstan halqyna úndeý joldap, olardy Halyqaralyq volonterlar kúnimen quttyqtady, - dep habarlaıdy «Adyrna» ulttyq portaly.
«Búgin, Halyqaralyq volonterlar kúninde biz basqalarǵa janqııarlyqpen kómekteskenderdi qurmetteımiz. Bizdiń volonterlar meıirimdilik pen qaıyrymdylyq, yntymaq pen azamattyq jaýapkershiliktiń joǵary ıdealdaryn beıneleıdi. Bul irgeli qundylyqtar «Adal Azamat» tujyrymdamasynyń negizinde jatyr. Áleýmettik mańyzy bar is-sharalarǵa qatysyp, qaıyrymdylyq jobalaryn júzege asyryp, muqtaj jandarǵa qamqorlyq jasap júrgenderdiń barlyǵyna alǵys aıtamyn. Shyǵarmashylyq is-áreketterińizde shynaıy patrıotızm kórinedi. Memleket eldegi eriktiler qozǵalysyna qoldaý kórsetýdi jalǵastyrady», - dep jazdy Prezıdent óziniń X (Twitter) paraqshasynda.
BUU-nyń resmı saıtynda Halyqaralyq eriktiler kúnin BUU Bas Assambleıasy bekitti. Ol jyl saıyn 5 jeltoqsanda toılanady.
«Bul kún eriktiler men uıymdar úshin óz jetistikterin atap ótýge, ıdeıalarmen bólisýge jáne jergilikti qaýymdastyqtar, úkimettik emes uıymdar (ÚEU), BUU agenttikteri, memlekettik organdar jáne jeke sektor arasynda óz jumysyn ilgeriletýge kómektesetin biregeı múmkindik», - deıdi BUU.
Birikken Ulttar Uıymynyń málimeti boıynsha, 15 jáne odan da joǵary jastaǵy eriktilerdiń aı saıynǵy sany álem boıynsha 862,4 mıllıon adamdy quraıdy. Volonterlik jobalardyń kópshiligi beıresmı túrde uıymdastyrylǵan — olarǵa álem halqynyń 14,3 paıyzy qatysady, al eńbekke qabiletti jastaǵy adamdardyń 6,5 paıyzy uıymdar nemese qaýymdastyqtar arqyly resmı volonterlik qyzmetke qatysady.
Resmı eriktiler arasynda er adamdar basym bolsa, beıresmı volonterler arasynda áıelder jıi kezdesedi. Qazvolunteer.kz platformasyndaǵy aqparatqa sáıkes, Qazaqstanda ulttyq volonterlik jeli 2010 jyly qurylǵan. Bul azamattardyń, azamattyq qoǵam ınstıtýttarynyń, kásipkerlik sektordyń jáne memlekettik organdardyń arasynda volonterlik qyzmet mádenıetin, volonterlik bastamalar men qyzmetti qalyptastyrý, qoldaý jáne damytý maqsatynda azamattar men zańdy tulǵalardyń erikti birlestigi.
«Adyrna» ulttyq portaly
