OLIMP.KZ بۋكمەكەرلىك كەڭسەسىنە (بك) قاتىستى ءىس جاڭادان اشىلعان ءمان-جايلارعا بايلانىستى قايتا قارالۋدا، دەپ حابارلايدى «ادىرنا» ۇلتتىق پورتالى قازتاگقا سىلتەمە جاساپ.
قازاقستان رەسپۋبليكاسىنىڭ باس پروكۋراتۋراسى OLIMP.KZ ءىسى بويىنشا سوتتالعانداردىڭ تۋىستارىنىڭ وتىنىشىنەن كەيىن جاڭادان اشىلعان ءمان-جايلار بويىنشا ءىستى قايتا تەرگەۋ (تەكسەرۋ) جۇمىستارىن جۇرگىزۋ تۋرالى شەشىم قابىلدادى.
«ايىپتالۋشىلاردىڭ تۋىستارى استانا قالاسى بويىنشا ۇلتتىق قاۋىپسىزدىك دەپارتامەنتىنە «OLIMP.KZ» بك قىلمىستىق ءىسىنىڭ تاپسىرىسپەن ورىندالۋى مۇمكىن فاكتىسى بويىنشا تەرگەۋ جۇمىستارىن جۇرگىزۋ تۋرالى وتىنىشپەن جۇگىندى»، - دەپ جەتكىزدى ۇقكد وكىلدەرى.
ايتا كەتەيىك، سوتتالعاندارعا 2014-2019 جىلدار ارالىعىندا Betgames ونلاين-كازينوسى تۇرىندەگى زاڭسىز ويىن بيزنەسىن جۇرگىزدى دەگەن ايىپ تاعىلدى. ناتيجەسىندە، 90 ميلليارد تەڭگەدەن استام سوماعا ويىن سالىعى مەن جەكە تابىس سالىعى تولەنبەگەن.
وسىعان بايلانىستى سوت ۇكىمى بويىنشا OLIMP.KZ بانك شوتىنداعى 20 ميلليارد تەڭگەگە جۋىق اقشانىڭ بارلىعى تاركىلەندى. بۇل رەتتە سوت ويىن سالىعى، جەكە تابىس سالىعى جانە زاڭسىز ويىن ويناۋ كەزەڭىندە ەسەپتەلگەن ءوسىمپۇل تۇرىندە قوسىمشا 90 ميلليارد تەڭگە ءوندىرۋ تۋرالى شەشىم قابىلداعان بولاتىن.
«ادىرنا» ۇلتتىق پورتالى
