ءماجىلىس توراعاسى ەرلان قوشانوۆ قازاقستاندا قوس بيلىكتىڭ جوق ەكەنىن ايتتى، دەپ حابارلايدى "ادىرنا" ۇلتتىق پورتالى.
جۋرناليست «سىزدەر قۇرىپ جاتقان "جاڭا قازاقستان" مەن "ەسكى قازاقستاننى" اراسىندا تەكەتىرەس ءجۇرىپ جاتىر دەگەن پىكىر بار. بۇعان سەبەپ ەكس-پرەزيدەنتتىڭ "استانا كلۋبى" جيىنىنا قاتىسىپ، رەسەي پرەزيدەنتى پۋتينمەن كەزدەسۋى بولىپ وتىر. حالىقتىڭ الاڭداۋىنا نەگىز بار ما؟» دەپ ءماجىلىس توراعاسىنا سۇراق قويدى.
- حالىقتىڭ الاڭداۋىنا، ءسىزدىڭ دە الاڭداۋىڭىزعا نەگىز جوق. ءبىرىنشى كەزەكتە، ەشبىر قوسبيلىك بۇگىنگى كۇنى جوق، بولۋى مۇمكىن دە ەمەس. بۇگىنگى كۇنى بارلىق شەشىمدى حالىق باسىم كوپشىلىگىمەن سايلاعان مەملەكەت باسشىسى قابىلدايدى، - دەيدى ول.
ونىڭ ايتۋىنشا، ەكس-پرەزيدەنت مەملەكەتتىك ىستەرگە ارالاسپايدى. ەكىنشىدەن، ونىڭ كەزدەسۋلەرى، ءىس-شارالارى، جول ساپارلارى جەكە ازامات رەتىندە ءوزىنىڭ قۇقىعىن پايدالانعانى.
ەسكە سالا كەتەيىك، ەكس-پرەزيدەنت پەن ونىڭ قىزىنىڭ حالىق الدىنا ۇزاق ۇزىلىستەن كەيىن قايتا شىعۋى، نۇرسۇلتان نازارباەۆتىڭ تاۋەلسىزدىك كۇنى قارساڭىندا ماسكەۋدە بولعانى، بۇرىنعى ەلباسىنىڭ جەلتوقساندا جاريالاعان ەستەلىگى تۋرالى دا ايتىلعان ەدى.
