قر تۋريزم جانە سپورت مينيسترلىگى سپورتتى دامىتۋ ديرەكتسياسى باسشىسىنىڭ ورىنباسارى ازيادا ويىندارىنا ارنالعان سپورتتىق كيىمدەرگە بولىنگەن 383 ميلليون تەڭگەنىڭ ۇرلىعىنا قاتىسى بار دەگەن كۇدىكپەن قاماۋعا الىندى، دەپ حابارلايدى “ادىرنا” ۇلتتىق پورتالى قارجى مونيتورينگى اگەنتتىگىنىڭ ءباسپاسوز قىزمەتىنە سىلتەمە تاستاپ.
«قما استانالىق دەپارتامەنتى تۋريزم جانە سپورت مينيسترلىگىنە قاراستى سپورتتى دامىتۋ ديرەكتسياسىنىڭ لاۋازىمدى تۇلعالارىنا اسا ءىرى كولەمدە قاراجات ۇرلاعانى ءۇشىن سوتقا دەيىنگى تەرگەۋدى باستادى. ماسەلەن، 2022 جىلى قازاقستان قۇراماسىنىڭ ازيا ويىندارىنا قاتىسۋى ءۇشىن وتە تومەن ساپاداعى قىتايلىق كروسسوۆكالار مەن ريۋكزاكتار ساتىپ الىندى. بۇل رەتتە ولاردىڭ قۇنى ءۇش ەسە ارتىق. سونىمەن قاتار جەتكىزۋشى اتالعان تاۋارلاردىڭ وتاندىق شىعۋ تەگى تۋرالى جالعان قۇجاتتاردى ۇسىنعان. ناتيجەسىندە مەملەكەت ەسەبىنەن 383 ملن تەڭگە جۇمسالعان", - دەلىنگەن سەنبى كۇنگى حابارلامادا.
قما-دا قازاقستان قۇراماسىنىڭ وكىلدەرى بۇعان دەيىن جابدىقتىڭ ساپاسىنا شاعىمدانىپ، ونى ءبىر رەتتىك دەپ اتاعانىن ەسكە سالدى.
"ديرەكتسيا باسشىسىنىڭ ورىنباسارى سوتتىڭ سانكتسياسىمەن قاماۋعا الىندى", - دەپ قوستى اگەنتتىك.
ەستەرىڭىزگە سالا كەتەيىك، قىتايدا وتكەن ازيا ويىندارىندا قازاقستاندىق قۇرامانىڭ سپورتشىلارى سپورتتىق فورمانىڭ ساپاسىزدىعىنا شاعىمدانىپ، ۆيدەو تۇسىرگەن بولاتىن.
“ادىرنا” ۇلتتىق پورتالى
