قاڭتار وقيعاسى كەزىندە 4 جاسار ايكوركەم مەلدەحاندى ءولتىردى دەپ ايىپتالعان اسكەري قىزمەتكەر ارمان جۇمان جەتى جىلعا سوتتالدى، دەپ حابارلايدى “ادىرنا” ۇلتتىق پورتالى.
زارداپ شەككەن تاراپتىڭ ادۆوكاتى جان كۇنسەركين ۇكىمگە قاناعاتتانعانىن ايتتى.
– ول سوت زالىندا قاماۋعا الىندى. اقتاۋ ۇكىمى بۇزىلىپ، سوتتىلىق ۇكىمى قايتارىلدى. 7 جىلعا باس بوستاندىعىنان ايىرۋ جازاسى تاعايىندالدى. ۇكىمگە قاناعاتتاندىم. بىراق ازىرگە جالپى ناتيجەگە كوڭىلىم تولادى دەپ ايتا المايمىن. بىراق مەن بۇگىنگى ۇكىمگە قاناعاتتانعانىمدى تاعى قايتالايمىن، - دەدى ول.
ال ايكوركەمنىڭ اكەسى ايدوس مەلدەحان ۇكىمگە كەلىسپەيتىنىن ايتتى بۇل تۋرالى «ازاتتىق راديوسى» جازدى.
– ءىس «بيلىكتى اسىرا پايدالانۋ» ەمەس، «ادام ءولتىرۋ» بابى بويىنشا تەرگەلۋى كەرەك ەدى. 7 جىل دەگەن نە ول؟ ەكى جىلدان كەيىن-اق شىعىپ كەتەدى، — دەدى ايكوركەمنىڭ اكەسى ازاتتىققا.
ءبۇلدىرشىننىڭ اكەسى كولىككە وق اتقان بەس سارباز ەكەنىن ايتىپ، باسقالارىن تابۋدى جانە ءىستى «ادام ءولتىرۋ» بابىمەن جۇرگىزۋدى تالاپ ەتكەن.
الايدا تەرگەۋ «بيلىكتى اسىرا پايدالانۋ» بابى بويىنشا جۇرگىزىلدى جانە ءبىر عانا كۇدىكتى بولدى.
ايتا كەتسەك، بۇعان دەيىن الماتى گارنيزونى اسكەري سوتى 2022 جىلعى قاڭتار وقيعاسى كەزىندە ءتورت جاسار ايكوركەم مەلدەحاننىڭ ولىمىنە قاتىستى «قىزمەتتىك وكىلەتتىكتەرىن اسىرا پايدالاندى» دەپ ايىپتالعان اسكەري قىزمەتكەر ارمان جۇماندى اقتاپ شىققان بولاتىن.
ەسكە سالايىق، 4 جاستاعى ايكوركەم مەلدەحانعا اكەسى جانە ەكى باۋىرىمەن كولىكتە بولعان كەزدە وق تيگەن. وقيعا 2022 جىلدىڭ 7 قاڭتارىندا بولعان.
