Qaŋtar oqiǧasy kezınde 4 jasar Aikörkem Meldehandy öltırdı dep aiyptalǧan äskeri qyzmetker Arman Jūman jetı jylǧa sottaldy, dep habarlaidy “Adyrna” ūlttyq portaly.
Zardap şekken taraptyŋ advokaty Jan Künserkin ükımge qanaǧattanǧanyn aitty.
– Ol sot zalynda qamauǧa alyndy. Aqtau ükımı būzylyp, sottylyq ükımı qaitaryldy. 7 jylǧa bas bostandyǧynan aiyru jazasy taǧaiyndaldy. Ükımge qanaǧattandym. Bıraq äzırge jalpy nätijege köŋılım tolady dep aita almaimyn. Bıraq men bügıngı ükımge qanaǧattanǧanymdy taǧy qaitalaimyn, - dedı ol.
Al Aikörkemnıŋ äkesı Aidos Meldehan ükımge kelıspeitının aitty Būl turaly «Azattyq radiosy» jazdy.
– Is «Bilıktı asyra paidalanu» emes, «Adam öltıru» baby boiynşa tergeluı kerek edı. 7 jyl degen ne ol? Ekı jyldan keiın-aq şyǧyp ketedı, — dedı Aikörkemnıŋ äkesı Azattyqqa.
Büldırşınnıŋ äkesı kölıkke oq atqan bes sarbaz ekenın aityp, basqalaryn tabudy jäne ıstı «Adam öltıru» babymen jürgızudı talap etken.
Alaida tergeu «Bilıktı asyra paidalanu» baby boiynşa jürgızıldı jäne bır ǧana küdıktı boldy.
Aita ketsek, būǧan deiın Almaty garnizony äskeri soty 2022 jylǧy Qaŋtar oqiǧasy kezınde tört jasar Aikörkem Meldehannyŋ ölımıne qatysty «qyzmettık ökılettıkterın asyra paidalandy» dep aiyptalǧan äskeri qyzmetker Arman Jūmandy aqtap şyqqan bolatyn.
Eske salaiyq, 4 jastaǧy Aikörkem Meldehanǧa äkesı jäne ekı bauyrymen kölıkte bolǧan kezde oq tigen. Oqiǧa 2022 jyldyŋ 7 qaŋtarynda bolǧan.
