Qańtar oqıǵasy kezinde 4 jasar Aıkórkem Meldehandy óltirdi dep aıyptalǵan áskerı qyzmetker Arman Juman jeti jylǵa sottaldy, dep habarlaıdy “Adyrna” ulttyq portaly.
Zardap shekken taraptyń advokaty Jan Kúnserkın úkimge qanaǵattanǵanyn aıtty.
– Ol sot zalynda qamaýǵa alyndy. Aqtaý úkimi buzylyp, sottylyq úkimi qaıtaryldy. 7 jylǵa bas bostandyǵynan aıyrý jazasy taǵaıyndaldy. Úkimge qanaǵattandym. Biraq ázirge jalpy nátıjege kóńilim tolady dep aıta almaımyn. Biraq men búgingi úkimge qanaǵattanǵanymdy taǵy qaıtalaımyn, - dedi ol.
Al Aıkórkemniń ákesi Aıdos Meldehan úkimge kelispeıtinin aıtty Bul týraly «Azattyq radıosy» jazdy.
– Is «Bılikti asyra paıdalaný» emes, «Adam óltirý» baby boıynsha tergelýi kerek edi. 7 jyl degen ne ol? Eki jyldan keıin-aq shyǵyp ketedi, — dedi Aıkórkemniń ákesi Azattyqqa.
Búldirshinniń ákesi kólikke oq atqan bes sarbaz ekenin aıtyp, basqalaryn tabýdy jáne isti «Adam óltirý» babymen júrgizýdi talap etken.
Alaıda tergeý «Bılikti asyra paıdalaný» baby boıynsha júrgizildi jáne bir ǵana kúdikti boldy.
Aıta ketsek, buǵan deıin Almaty garnızony áskerı soty 2022 jylǵy Qańtar oqıǵasy kezinde tórt jasar Aıkórkem Meldehannyń ólimine qatysty «qyzmettik ókilettikterin asyra paıdalandy» dep aıyptalǵan áskerı qyzmetker Arman Jumandy aqtap shyqqan bolatyn.
Eske salaıyq, 4 jastaǵy Aıkórkem Meldehanǵa ákesi jáne eki baýyrymen kólikte bolǵan kezde oq tıgen. Oqıǵa 2022 jyldyń 7 qańtarynda bolǵan.
