اقتوبە وبلىسىنداعى تۇگەلدەي سۋعا كەتكەن بەرسيەۆ اۋىلىندا قالعان 250 ادام تىكۇشاقپەن ەۆاكۋاتسيالاندى، دەپ حابارلايدى "ادىرنا" ۇلتتىق پورتالى قورعانىس مينيسترلىگىنىڭ ءباسپاسوز قىزمەتىنە سىلتەپ.
«29 ناۋرىزدا قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ مي-8 تىكۇشاعىنىڭ ەكيپاجى مايور ج.و.بەكباۋليەۆتىڭ باسقارۋىمەن سۋ تاسقىنىندا توتەنشە جاعدايدا قالعان ادامداردى قۇتقارۋ بويىنشا ەۆاكۋاتسيالاۋ شارالارىنا قاتىستى. اقتوبە وبلىسى ويىل اۋدانى بەرسيەۆ اۋىلىنداعى ايماقتىڭ ادامدارى تاسىمالداندى»، - دەپ حابارلادى قورعانىس مينيسترلىگى.
بۇعان دەيىن باق-تا بەرسيەۆ اۋىلىنداعى مەكتەپتى ەۆاكۋاتسيالاۋ پۋنكتىندە 250-گە جۋىق ادام جاتقانى حابارلانعان بولاتىن. تۇرعىنداردىڭ ايتۋىنشا، تىكۇشاق بىرنەشە ۋاقىت قوناتىن جەر تاپپاي، قايتا ۇشىپ كەتكەن.
قورعانىس مينيسترلىگىنەن بىزگە حابارلاعانداي، مەكتەپ اينالاسى شىنىمەن دە سۋعا تولىپ، قونۋعا مۇمكىندىك بولماعان. ورىن تاڭداپ العان بريگادا مەكتەپ عيماراتىنان 600-800 مەتر جەرگە تۇراقتادى. سونداي-اق ول جەردە باسقا عيماراتتىڭ توبەسىندە 15-تەن استام ادام جاتقانى جانە ولاردىڭ ومىرىنە بىردەن قاۋىپ ءتونىپ تۇرعانى تۋرالى اقپارات تۇسكەن.
«ەكيپاج كومانديرى الدىمەن عيماراتتىڭ توبەسىندە بىردەن قاۋىپ تونگەن ادامداردى قۇتقارۋدى شەشتى. عيماراتتىڭ ۇستىندە 1 مەتر بيىكتىكتە كوتەرىلگەن بارلىق ادامدار امان-ەسەن قۇتقارىلدى. سول كەزدە قالعان جانار-جاعارمايدى ەسەپكە الىپ، تىكۇشاق قۇتقارىلعان ادامداردى اقتوبەگە جەتكىزىپ، جانارماي قۇيىپ، اۋىلعا قايتا ۇشتى»، - دەپ ءتۇسىندىردى دەپارتامەنتتەگىلەر.
بەلسەندىلەر بەرسيەۆ اۋىلىنداعى جايتقا بايلانىستى دابىل قاعۋدا. ولار ەشقانداي دايىندىقتىڭ جوعىن ايتىپ، كومەككە كەتكەن قوعام بەلسەندىلەرىنەن اتالمىش اۋىلدى نازارسىز قالدىرماۋدى سۇراۋدا.
"اقتوبە وبلىسىنداعى ش. بەرسيەۆ اۋىلى تۇگەل سۋعا كەتتى. اۋىلداعى 1200 ادامدى مەكتەپكە اكەلىپ ورنالاستىرعان. بىراق ءبىرىنشى قاباتى مالمانداي بولعان ءبىلىم وشاعىنىڭ قابىرعالارى قاق ايىرىلىپ، شىتىناپ جاتىر ەكەن. جانىن شۇبەرەككە تۇيگەن جۇرت ەكىنشى قاباتىندا قىسىلىسىپ جاتىر. ەلۋ جىل بۇرىن سالىنعان ەسكى مەكتەپ ىلعالعا شىداماي قۇلاسا، ءبىر اۋىلدىڭ حالقى تۇگەل قىرىلادى. قۇداي ساقتاسىن مۇندايدان. بىراق ءبىر اپتادان بەرى بولىپ جاتقان تاسقىنعا تۇك دايىندىق جوق. نە تاماق نە جاتىن ورىن نە قۇتقارۋشى نە قايىق جوق. كەيبىر تۇرعىندار شاتىردا قالعان. اۋىلدا تىكۇشاق قوناتىن قۇرعاق جەر جوق. ويىلدىڭ حالقىنا شۇعىل كومەك كەرەك. بەرسيەۆكە دە بارىڭىز" دەپ جازدى بەلسەندى دياس نۇراقىن.
