قازاقستان پرەزيدەنتى قاسىم-جومارت توقاەۆ ۇلىبريتانيانىڭ سىرتقى ساياسات ۆەدومستۆوسىنىڭ باسشىسى دەۆيد كەمەرونعا ءىلتيپات بىلدىرە وتىرىپ، ونىڭ قازاقستانعا ساپارى ەكىجاقتى قاتىناستاردى دامىتۋعا تىڭ سەرپىن بەرۋ تۇرعىسىنان ءمانى زور ەكەنىن ايتتى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
ء“بىزدىڭ ماڭىزدى ستراتەگيالىق سەرىكتەسىمىز – ۇلىبريتانيامەن اراداعى ءوزارا ءتيىمدى ىنتىماقتاستىقتىڭ قارقىندى دامىپ كەلە جاتقانىنا كوڭىلىمىز تولادى. بۇگىن ستراتەگيالىق سەرىكتەستىك جانە ىنتىماقتاستىق تۋرالى كەلىسىمگە قول قويىلعانىن ايرىقشا اتاپ وتكىم كەلەدى. بۇل جان-جاقتى قۇجات ءبىزدىڭ سان قىرلى بايلانىستارىمىزدى كەڭەيتۋ ءۇشىن بەرىك نەگىز قالايتىنىنا سەنىمدىمىن”، – دەدى پرەزيدەنت.
مەملەكەت باسشىسى ساۋدا-ەكونوميكالىق جانە ينۆەستيتسيالىق ىقپالداستىقتى، سونىڭ ىشىندە ەنەرگەتيكا، «جاسىل» ەكونوميكا، قارجى، يننوۆاتسيا سالالارىنداعى ىنتىماقتاستىقتى نىعايتۋعا مول الەۋەت بار ەكەنىنە نازار اۋداردى.
ءوز كەزەگىندە دەۆيد كەمەرون قوناقجايلىق تانىتقانى ءۇشىن قاسىم-جومارت توقاەۆقا العىس ايتتى. سونداي-اق ۇلىبريتانيا پرەمەر-ءمينيسترى رەتىندە قازاقستانعا جاساعان العاشقى ساپارىن ىقىلاسپەن ەسكە الدى.
“مەن مۇندا 11 جىل بۇرىن ەكى ەل اراسىنداعى ستراتەگيالىق ديالوگتى باستاۋ ءۇشىن كەلگەن ەدىم. بۇگىن قازاقستاننىڭ سىرتقى ىستەر مينيسترىمەن ستراتەگيالىق سەرىكتەستىك جانە ىنتىماقتاستىق تۋرالى كەلىسىمگە قول قويدىق. ەنەرگەتيكا، ءبىلىم، بيزنەس جانە مادەنيەت سالالارىنداعى ىنتىماقتاستىقتى نىعايتۋعا جانە حالىقتار اراسىنداعى بايلانىستاردى وركەندەتۋگە نيەتتىمىز”، – دەدى ۇلىبريتانيا سىرتقى ىستەر ءمينيسترى.
اڭگىمەلەسۋ بارىسىندا مادەني-گۋمانيتارلىق بايلانىستاردى تەرەڭدەتۋ، اسىرەسە، ءبىلىم بەرۋ سالاسى مەن جاستاردى قولداۋ ىسىنە ەرەكشە نازار اۋدارىلدى.
سونىمەن قاتار قاسىم-جومارت توقاەۆ پەن دەۆيد كەمەرون وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
ايتا كەتەيىك، ۇلىبريتانيا ەۋروپالىق وداقتىڭ قۇرامىندا 11 جىل بۇرىن بولدى.
ۇلىبريتانيا 1992 جىلى مااستريحت كەلىسىمىنە قول قويىپ، ەۋروپالىق وداقتىڭ قۇرامىنا ەنەدى. دەگەنمەن، ساياسي تۇرعىدا مۇمكىندىگىنشە وقشاۋلانۋعا تىرىسىپ، ۆيزالىق شەكتەۋلەردى جوياتىن شەنگەن كەلىسىمىنە نارازى بولدى، ورتاق ۆاليۋتا ەۋرونى قابىلدامادى.
ال، ەكونوميكالىق داعدارىس كەزىندە بريتاندىقتار ەۋرووداقتان شىعۋ تۋرالى بۇكىلحالىقتىق رەفەرەندۋم ۇيىمداستىردى. ناتيجەسىندە كورولدىك تۇرعىندارىنىڭ 52 پايىزى ەۋرووداقتان شىعۋدى ۇيعاردى.
