اقش-تىڭ ىشكى قاۋىپسىزدىك مينيسترلىگى (DHS) 30 ءساۋىر كۇنى ورتالىق ازيا ەلدەرىنىڭ جۇزدەن استام ازاماتى وتانىنا قايتارۋ ءۇشىن رەيس ۇيىمداستىرىپ، ونىڭ بارلىق شىعىنىن وتەگەنى ءۇشىن وزبەكستان پرەزيدەنتى شاۆكات ميرزيوەۆكە العىس ءبىلدىردى. بۇل تۋرالى DHS ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
«ءبىز وزبەكستان پرەزيدەنتى شاۆكات ميرزيوەۆكە 131 زاڭسىز يمميگرانتتى ءوز وتانىنا قايتارۋ ءۇشىن رەيس ۇيىمداستىرعانىنا العىس ايتامىز»، – دەدى مينيسترلىك باسشىسى كريستي لينن نوەم.
DHS مالىمەتىنشە، وزبەكستان ءوز ازاماتتارىن ەلگە قايتارۋ بويىنشا دەپورتاتسيا شاراسىنىڭ بارلىق شىعىندارىن تولىقتاي قارجىلاندىرعان. بۇل وپەراتسيا ەكى ەل اراسىندا قاۋىپسىزدىك سالاسىنداعى تىعىز ىنتىماقتاستىقتى كورسەتەدى جانە اقش-تىڭ وزگە وداقتاستارىنا ۇلگى بولا الادى، دەلىنگەن حابارلامادا.
«ءبىز وزبەكستانمەن ءوزارا قاۋىپسىزدىكتى نىعايتۋ جانە زاڭ ۇستەمدىگىن قامتاماسىز ەتۋ باعىتىنداعى جۇمىستى جالعاستىرۋعا نيەتتىمىز»، – دەپ قوستى نوەم.
دەپورتاتسيالىق رەيستىڭ جولاۋشىلارى اراسىندا وزبەكتەردەن بولەك قازاقستان جانە قىرعىزستان ازاماتتارى دا بولعان. ولاردىڭ بارلىعى اقش اۋماعىندا زاڭسىز جۇرگەنى انىقتالىپ، دەپورتاتسيالانۋعا جاتاتىن شەتەلدىكتەر تىزىمىنە ەنگىزىلگەن.
30 ساۋىرگە نيۋ-يوركتەن تاشكەنتكە ارنايى چارتەرلىك رەيس ۇيىمداستىرىلاتىنىن وزبەكستان سىرتقى ىستەر مينيسترلىگىنىڭ ءباسپاسوز حاتشىسى احرور بۋرحانوۆ الدىن الا حابارلاعان بولاتىن.
«بۇل رەپاترياتسيالىق باستاما شەتەلدە قيىن جاعدايعا تاپ بولعان وزبەكستان ازاماتتارىنىڭ قۇقىقتارىن قامتاماسىز ەتۋگە باعىتتالعان جانە حالىقارالىق نورمالار، مىندەتتەمەلەر مەن ادام قۇقىقتارى اياسىندا جۇزەگە اسىرىلۋدا. رەيس ۆيزا ءتارتىبىن بۇزعان نەمەسە اقش-تا زاڭدى بولۋ مەرزىمى ءوتىپ كەتكەن ازاماتتاردى ەلگە قايتارۋعا ارنالعان. رەپاترياتسيا پروتسەسى گۋمانيستىك جانە قۇقىقتىق قاعيداتتارعا سۇيەنە وتىرىپ، ازاماتتاردىڭ ابىرويلى ءارى قاۋىپسىز ورالۋىن قامتاماسىز ەتۋگە باعىتتالعان»، – دەدى بۋرحانوۆ.
ايتا كەتەيىك، اقش-تىڭ پرەزيدەنتى دونالد ترامپ ميگراتسيالىق ساياساتتى قاتاڭداتاتىنىن بىرنەشە رەت مالىمدەگەن. 2025 جىلعى 20 قاڭتاردا وتكەن يناۋگۋراتسيادان كەيىن ەلدەن زاڭسىز جۇرگەن شەتەلدىكتەردى دەپورتاتسيالاۋ باستالدى. 2024 جىلدىڭ قاراشا ايىنىڭ سوڭىنداعى اقش بيلىگىنىڭ مالىمەتىنشە، دەپورتاتسيالانۋى ءتيىس ازاماتتار سانى: 975 وزبەكستاندىق، 369 قازاقستاندىق، 319 قىرعىزستاندىق، 149 تاجىكستاندىق جانە 40 تۇرىكمەنستاندىق.
ەسكە سالساق، قازاقستاننىڭ اقش-تاعى ەلشىلىگى بۇعان دەيىن زاڭسىز جۇرگەن قازاقستاندىقتاردى ءوز ەركىمەن ەلگە ورالۋعا شاقىرىپ، ولارعا جەڭىلدىكتەر قاراستىرىلاتىنىن حابارلاعان بولاتىن.
بۇعان قوسا، بيىل اقپاندا اقش-تا كوشى-قون زاڭىن بۇزدى دەگەن كۇدىكپەن بىرنەشە قازاقستاندىق ۇستالعان. كوستا-ريكا ترامپ اكىمشىلىگى تۇسىندا دەپورتاتسيالانعان العاشقى 200 ميگرانتتى قابىلداعان، ولاردىڭ اراسىندا ءۇش قازاقستاندىق بولعان.
