ليۆەرپۋلدە انگليا پرەمەر-ليگاسىندا جەڭىسكە جەتكەن «ليۆەرپۋل» فۋتبول كلۋبىنىڭ جەڭىسىن اتاپ ءوتۋ كەزىندە كولىك جاياۋ جۇرگىنشىلەردى قاعىپ كەتتى. قالالىق اۋرۋحانالارعا 27 ادام جەتكىزىلدى، ولاردىڭ تورتەۋى – بالالار. بۇل تۋرالى 26 مامىر كۇنى كەشكە وتكەن بريفينگتە جەدەل جاردەم قىزمەتىنىڭ وكىلى دەۆيد كيتچەن مالىمدەدى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
ونىڭ ايتۋىنشا، جاراقات العانداردىڭ ەكەۋى – ەرەسەك ادام مەن بالا – اۋىر جارالانعان.
وقيعا ليۆەرپۋل قالاسىنىڭ ورتالىعىندا بولعان. وندا ءداستۇرلى شەرۋ وتكەن: چەمپيون اتانعان فۋتبول كلۋبىنىڭ ويىنشىلارى كۋبوكتى قولدارىنا ۇستاپ، اشىق اۆتوبۋستا كەلە جاتقان. شەرۋ اياقتالعان سوڭ، ادامدار تاراي باستاعاندا، Ford ماركالى كولىك توپتىڭ ىشىنە كىرىپ كەتكەن.
مەرسيسايدتىق ءورت ءسوندىرۋ جانە قۇتقارۋ قىزمەتىنىڭ باسشىسى نيك ءسيرلدىڭ ايتۋىنشا، سوقتىعىس سالدارىنان ءتورت ادام ء(ۇش ەرەسەك جانە ءبىر بالا) كولىك استىندا قالىپ قويعان.
پوليتسيا باسشىسىنىك كومەكشىسى دجەنني سيمس ءباسپاسوز ءماسليحاتىندا زارداپ شەككەندەردىڭ كەيبىرىنە (ولار 20 ادام بولعان) العاشقى كومەك وقيعا ورنىندا كورسەتىلگەنىن ايتتى.
