2025 جىلعى ماۋسىمدا قازاقستان رەسپۋبليكاسى ۇلتتىق بانكىنىڭ اقشا-كرەديت ساياساتى كوميتەتى بازالىق مولشەرلەمەنى جىلدىق 16,5% دەڭگەيىندە، +/- 1 پ.ت. دالىزىمەن ساقتاۋ تۋرالى شەشىم قابىلدادى. بۇل شەشىم ناقتى دەرەكتەر مەن جاڭارتىلعان بولجامداردى، سونداي-اق ينفلياتسيا تاۋەكەلدەرىنىڭ بالانسىن ەسكەرە وتىرىپ قابىلداندى.
ەكونوميست ماقسات حالىق بۇل شەشىمگە قاتىستى ويىمەن ءبولىستى. ونىڭ ايتۋىنشا، قازىرگى جاعدايدا بازالىق مولشەرلەمەنى ساقتاۋ – ينفلياتسيانى باقىلاۋدا ۇستاۋدىڭ ماڭىزدى تەتىگى.
«نارىقتاعى ارتىق اقشانى سول نارىقتان الۋدىڭ ءبىر جولى – بازالىق پايىزدىق مولشەرلەمەنى كوتەرۋ نەمەسە جوعارى دەڭگەيدە ساقتاۋ. ۇلتتىق بانك ءدال وسى قۇرال ارقىلى ينفلياتسيانى اۋىزدىقتاۋعا ارەكەت ەتىپ وتىر»، – دەيدى ساراپشى.ەكونوميستىڭ ايتۋىنشا، مولشەرلەمەنىڭ جوعارى بولۋى بانكتەردەگى سالىمداردىڭ تابىستىلىعىن ارتتىرادى. بۇل حالىق پەن بيزنەس ءۇشىن تەڭگەدە جيناق ساقتاۋعا ىنتالاندىرۋ تۋعىزىپ، ەكونوميكاداعى ارتىق وتىمدىلىكتى ازايتادى. ال ارتىق اقشا ماسساسىنىڭ قىسقارۋى ينفلياتسيالىق قىسىمدى تومەندەتۋگە كومەكتەسەدى. ساراپشى سونىمەن قاتار مۇناي باعاسىنىڭ تومەندەۋى مەن تەڭگەگە سىرتقى قىسىم كۇشەيگەن جاعدايدا بازالىق مولشەرلەمەنى ساقتاۋ – ۇلتتىق ۆاليۋتانىڭ تۇراقتىلىعىن قولداۋدىڭ دا ءبىر جولى ەكەنىن اتاپ ءوتتى.
«مۇناي باعاسى تومەندەپ، ەكسپورت ازايعان كەزدە تولەم بالانسىنىڭ تاپشىلىعى ارتادى. بۇل تەڭگەگە قىسىم جاسايدى. وسىنداي جاعدايدا جوعارى پايىزدىق مولشەرلەمە تەڭگە اكتيۆتەرىنىڭ تارتىمدىلىعىن ساقتاپ، دەۆالۆاتسيالىق قىسىمدى باسەڭدەتەدى»، – دەيدى ماقسات حالىق.مامىر ايىنىڭ قورىتىندىسى بويىنشا جىلدىق ينفلياتسيا 11,3%-عا جەتتى. باعا ءوسىمىنىڭ نەگىزگى سەبەبى – رەتتەلەتىن تاريفتەر مەن نارىقتىق قىزمەتتەردىڭ ايتارلىقتاي قىمباتتاۋىنا بايلانىستى سەرۆيستىك ينفلياتسيا. ازىق-تۇلىك تاۋارلارى بويىنشا دا باعا ءوسىمى جەدەلدەدى. ايلىق ينفلياتسيا مامىردا 0,9%-عا جەتىپ، تاريحي ورتاشا دەڭگەيدەن اسىپ ءتۇستى. ال بازالىق جانە ماۋسىمدىق اسەرلەردەن تازارتىلعان ينفلياتسيا تيىسىنشە 10,1% جانە 11,4% بولدى. ماقسات حالىقتىڭ پىكىرىنشە، بۇل دەرەكتەر ىشكى سۇرانىستىڭ ارتۋى، ءوندىرىس شىعىندارىنىڭ ءوسۋى مەن فيسكالدىق ىنتالاندىرۋدىڭ اسەرى ينفلياتسيالىق قىسىمدى كۇشەيتىپ وتىرعانىن كورسەتەدى. مامىردا حالىقتىڭ ينفلياتسيالىق كۇتۋلەرى دە جوعارىلادى – ساۋىردەگى 12,2%-دان 14,1%-عا دەيىن ءوستى. بۇل نارىقتا ينفلياتسياعا قاتىستى بەلگىسىزدىك پەن قۇبىلمالىلىق ءالى دە بار ەكەنىن اڭعارتادى.
«سوندىقتان ءدال قازىر مولشەرلەمەنى تومەندەتۋ ەرتە بولار ەدى»، – دەيدى ساراپشى.وسىلايشا، ۇلتتىق بانكتىڭ مولشەرلەمەنى 16,5% دەڭگەيىندە ساقتاۋ تۋرالى شەشىمى – حالىقتى تەڭگەلىك اكتيۆتەر جيناقتاۋعا ىنتالاندىراتىن جانە ينفلياتسيامەن كۇرەستە ماڭىزدى ءرول اتقاراتىن پراگماتيكالىق قادام دەۋگە بولادى.
