قازاقستاندا جاقىن ارادا “ەرىكتى” جانە ء“وزىن-ءوزى قورعاۋ جاساقتارى” ۇعىمدارى رەسمي تۇردە زاڭ جۇزىندە بەكىتىلەدى، دەپ حابارلايدى “ادىرنا” ۇلتتىق پورتالى Tengrinews.kz-كە سىلتەپ.
بۇل تۋرالى سەنات كۋلۋارىندا قورعانىس ۆيتسە-ءمينيسترى سۇلتان كامالەتدينوۆ جۋرناليستەردىڭ ساۋالىنا جاۋاپ بەردى.
“بۇل وزگەرىستەر الدىن الا جاسالعان قادام با؟”- دەگەن سۇراققا ۆيتسە-مينيستر كامالەتدينوۆ:
ء“بىر-اق سوزبەن ايتايىن. ءيا، بۇل — الدىن الۋ شارالارى. كەشە جاساۋ مۇمكىن بولمادى، ال ون جىلدان كەيىن كەش بولۋى مۇمكىن. الەمدەگى جانە ايماقتاعى گەوساياسي جاعدايعا بايلانىستى ءبىز مۇنداي قادامعا كەلىپ وتىرمىز. بارلىعىن اسكەردىڭ باقىلاۋىنا الۋ مۇمكىن ەمەس”، — دەپ جاۋاپ بەردى.
ونىڭ ايتۋىنشا، ەگەر قازاقستاندىقتار ءوز ەرىكتەرىمەن ء“ۇيىن قورعاۋعا دايىن بولسا”، قورعانىس مينيسترلىگى بۇعان قارسى بولمايدى.
“بۇل — جاقسى نيەت”، — دەدى ول.
بۇگىن سەنات دەپۋتاتتارى “تەرريتوريالىق قورعانىس تۋرالى” زاڭ جوباسىن ەكى وقىلىمدا ماقۇلدادى. زاڭ اياسىندا اكىمدەرگە جاڭا وكىلەتتىكتەر دە بەرىلگەن. ولار ءوز وڭىرلەرىندەگى تەرريتوريالىق قورعانىستى باسقارۋعا جاۋاپتى بولادى.
اتاپ وتسەك، بۇل زاڭ اياسىندا ەنگىزىلەتىن جاڭا ۇعىمدار بار. ء“وزىن-ءوزى قورعاۋ جاساقتارى” — اسكەري جاعداي كەزىندە جەرگىلىكتى اسكەري باسقارۋ ورگاندارى ارقىلى قۇرىلاتىن ازاماتتىق قۇرىلىم.
ال “ەرىكتىلەر” — ءوزىن-ءوزى قورعاۋ جاساقتارىنا ءوز ەركىمەن قوسىلعان قر ازاماتتارى.
ۇقساس جاڭالىقتار
