9 ماۋسىم كۇنى لوس-اندجەلەستە ءوتىپ جاتقان جاپپاي نارازىلىق شارالارىن ءتۇسىرۋ كەزىندە اۆستراليالىق 9News تەلەارناسىنىڭ ءتىلشىسى لورەن توماسي جاراقات الدى. بۇل تۋرالى تەلەارنانىڭ رەسمي سايتىندا جاريالاندى، دەپ حابارلايدى “ادىرنا”.
وقيعا ءتىلشى تىكەلەي ەفيردە رەپورتاج جۇرگىزىپ جاتقان ساتتە ورىن العان. كوشە ورتاسىنداعى ءتۇسىرىلىم كەزىندە ونىڭ سول اياعىنا تىزەدەن تومەن جەرگە رەزەڭكە وق تيگەن. وقتى نارازىلىقتى باقىلاپ تۇرعان امەريكالىق پوليتسيا قىزمەتكەرلەرىنىڭ ءبىرى اتقان.
تەلەارنا مالىمەتىنە سايكەس، ءتىلشى قاقتىعىستاردىڭ قىزعان ورتاسىندا قالىپ قويعان. زارداپ شەككەننەن كەيىن ول دەرەۋ مەديتسينالىق كومەككە جۇگىندى. ءجۋرناليستىڭ ومىرىنە قاۋىپ ءتونىپ تۇرعان جوق.
بۇل وقيعا اقش-تا ءۇشىنشى كۇن قاتارىنان جالعاسىپ جاتقان جاپپاي نارازىلىق شارالارى كەزىندە تىركەلدى. نارازىلىقتار زاڭسىز ميگرانتتاردى انىقتاۋعا ارنالعان پوليتسيا رەيدىنەن كەيىن باستالعان بولاتىن. رەيد بارىسىندا 45 ادام ۇستالدى.
7 ماۋسىمدا اقش پرەزيدەنتى دونالد ترامپ تارتىپسىزدىكتەردىڭ الدىن الۋ ماقساتىندا كاليفورنيا شتاتىنا ۇلتتىق گۆارديا كۇشتەرىن جىبەرۋ تۋرالى بۇيرىق بەرگەن. بۇل شەشىمدى 22 شتاتتىڭ گۋبەرناتورى بيلىكتى اسىرا پايدالانۋ رەتىندە باعالاپ، سىنعا الدى.
