سەنات پاتەردى قولما-قول ساتىپ الۋعا تىيىم سالدى، دەپ حابارلايدى “ادىرنا” ۇلتتىق پورتالى.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قۇرىلىسىنا ۇلەستىك قاتىسۋ، اۆتوموبيل جولدارى جانە مۇگەدەكتىگى بار ادامداردى تاسىمالداۋ جونىندەگى قىزمەتتەردى كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى. سەناتور سۇيىندىك الداشەۆتىڭ ايتۋىنشا، قۇجاتتىڭ ماقساتى – ۇلەستىك قۇرىلىستى مەملەكەتتىك تۇرعىدان قاتاڭ باقىلاۋعا الۋ، زاڭسىز قۇرىلىس كولەمىن ازايتۋ، اۆتوجول سالاسىنداعى كادرلىق الەۋەتتى كۇشەيتۋ جانە مۇگەدەكتىگى بار ازاماتتاردىڭ ءومىر ءسۇرۋ ساپاسىن ارتتىرۋ. ۇلەستىك قۇرىلىسقا قاتىستى جاڭا شەكتەۋلەر ەنگەن: • سالىنىپ جاتقان ۇيلەرگە الدىن الا شارت جاساۋعا تىيىم سالىنادى. • ۇلەسكەرلەردىڭ قارجىسىن تارتۋعا رۇقساتسىز جارناما جاساۋعا
تىيىم سالىنادى. • جەرگىلىكتى بيلىك قۇرىلىس پروتسەسىن قاتاڭ باقىلايدى. • قۇرىلىسى اياقتالماعان ۇيدەن يپوتەكا ارقىلى مۇلىك ساتىپ الۋعا شەكتەۋ قويىلادى. • بارلىق كەلىسىم تەك قولما-قول اقشاسىز جۇرگىزىلۋى ءتيىس • قۇرىلىس مەرزىمىن 9 ايدان 5 ايعا قىسقارتۋعا رۇقسات بەرىلەدى. جەرگىلىكتى اتقارۋشى ورگان رۇقسات بەرگەننەن كەيىن، قۇرىلىس سالۋشىلارعا تۇرعىن ءۇيدىڭ قاڭقاسى اياقتالماي تۇرىپ-اق ۇلەسكەرلەردەن اقشا تارتۋعا مۇمكىندىك بەرىلەدى. سونىمەن قاتار، قۇرىلىس سالۋشىنىڭ اكتيۆى بويىنشا تالاپتار 15%-دان 10%-عا دەيىن تومەندەتىلەدى. «بۇل شارالار ادال قۇرىلىس سالۋشىلارعا ۇلەسكەرلەردىڭ مۇددەسىنە نۇقسان كەلتىرمەي، جوبالاردى يكەمدى تۇردە قارجىلاندىرۋعا مۇمكىندىك بەرەدى»، – دەلىنگەن زاڭ جوباسىن ازىرلەۋشىلەردىڭ تۇسىندىرمەسىندە.