قازاقستاننىڭ باس مەملەكەتتىك سانيتار دارىگەرى ايجان ەسماعامبەتوۆا كوروناۆيرۋس ينفەكتسياسىنىڭ ءالى دە قاۋىپتى ەكەنىن ايتتى، - دەپ حابارلايدى Tengrinews.kz تىلشىسى.
ايجان ەسماعامبەتوۆا قازاقستاندا كوروناۆيرۋستىڭ جاپپاي تاراۋى ەڭبەك ۇجىمىنان تىس جەردە، ياعني، ادامدار كوپ جينالۋىنا بايلانىستى ەكەنىن ايتادى.
"قوناققا بارىپ، ۇيگە قوناق شاقىرامىز. مامانداردىڭ ەسكەرتۋىنە قاراماستان قاراپايىم ەرەجەلەردى ساقتامايمىز. (...) مىسالى، قاراعاندى وبلىسىندا كوروناۆيرۋس جۇقتىرعان ءبىر ادام انىقتالعاننان كەيىن ينفەكتسيانىڭ سەگىز وشاعى انىقتالعان. بۇل جاعدايدا ۇجىمنىڭ وزىندە 29 ادام، ال ءۇي وشاعىندا 11 ادام انىقتالدى. ياعني، انىقتالعان 11 جاعدايدان كەيىن تاعى 40 ادام انىقتالدى. ونىڭ ۇشەۋى - بالالار. تۇركىستان وبلىسىندا دا ءبىر ناۋقاس انىقتالعاننان كەيىن بىردەن سەگىز وشاق تىركەلدى. ناتيجەسىندە 20 ادام جۇقتىرعان. ونىڭ ەكەۋى 60 جاستان جوعارى ادامدار", - دەيدى ايجان ەسماعامبەتوۆا وقك بريفينگىندە.
سونىمەن قاتار، جۇك كولىگىنىڭ جۇرگىزۋشىسى ۇجىمىنداعى 6 ادامعا كوروناۆيرۋس جۇقتىرعان.
"ولار (التى ادام - اۆتور) ينفەكتسيانى ۇيلەرىنە تاسىمالداپ، تاعى 14 ادام جۇقتىرعان. نۇر-سۇلتان قالاسىندا ءبىر وتباسىنىڭ بىردەن بەس مۇشەسى ۆيرۋس جۇقتىرعان. ونىڭ ىشىندە قاۋىپتى توپتاعى ەگدە جاستاعى ادامدار، ياعني، ولاردىڭ اتا-اناسى. (...) ايتا كەتەتىن جايت، اۋىزاشارعا بارعانداردان دا كوروناۆيرۋس انىقتالدى. وسى سەكىلدى مىسالدار ارقىلى اۋرۋدى اۋىر وتكىزەتىن، ارتى ولىمگە اكەلىپ سوعاتىن ۇلكەن ادامدار بىردەن جۇقتىرىپ الۋى مۇمكىن ەكەنىن ايتقىم كەلەدى. وكىنىشكە قاراي، ونداي جاعدايلار دا تىركەلدى", - دەيدى باس سانيتار دارىگەر.
ەسكە سالايىق، قازاقستاندا كوروناۆيرۋس ينفەكتسياسىن جۇقتىرعان 6 969 ادام انىقتالدى. ونىڭ ىشىندە 3 649 ادام اۋرۋدان ايىقسا، 35 ادام قايتىس بولدى.
