سوڭعى ۋاقىتتا پاۆلودار وبلىسى ەكىباستۇز قالاسىنىڭ ۇستازدار قاۋىمىنان "ادىرناعا" شاعىم جيىلەپ تۇر. حابارلاسۋشىلاردىڭ كوبى اتى-جوندەرىن اتاعىسى كەلمەيدى. شاعىم كوپ بولعانىمەن، تاقىرىپ بىرەۋ: ەڭبەك دەمالىسى تولەمى مەن زەينەتاقى اۋدارىمدارىنىڭ دۇرىس ەمەستىگى.
تاياۋدا "ادىرنا" پوشتاسىنا تاعى ءبىر حات ءتۇستى. ءماتىنى تومەندەگىدەي:
"مەن ەكىباستۇز قالاسىنا قاراستى بۇرىنعى قاراسۋ، قازىرگى بەسقاۋعا ورتا مەكتەبىنىڭ مۇعالىمىمىن. وسى جىلعى ەڭبەك دەمالىسىنا ماۋسىم ايىنىڭ ءبىرى كۇنى شىقتىم. الايدا سول كۇننەن بەرى ءبىر جارىم ايعا جۋىق ۋاقىت بولسا دا، ءالى كۇنگە ەڭبەك دەمالىسىنىڭ اقىسىن تۇگەل الا الماي وتىرمىن. مەكتەپ باسشىسىنا حابارلاسىپ، ماسەلەنى شەشىپ بەرۋدى سۇرادىق. وكىنىشكە قاراي، مەكتەپ باسشىسى بار كىنانى مەكتەپتىڭ بۋحگالتەرياسىنا اۋدارىپ، ماردىمدى جاۋاپ بەرمەيدى. ديرەكتوردىڭ ايتۋىنشا، بۇرىنعى ەسەپشىمىز اقشانى دۇرىس ەسەپتەمەي، سونىڭ سالدارىنان مۇعالىمدەرگە ارتىق اقشا سالىپ جىبەرىپتى. ديرەكتور سول اقشانى كەرى قايتارىڭدار، سوندا عانا وتپۋسكنويلارىڭدى الاسىڭدار دەپ وتىر. ەسەپشىنىڭ جىبەرگەن قاتەلىگى ءۇشىن ءبىز نەگە زارداپ شەگۋىمىز كەرەك؟ وتپۋسكنوي اقشامىزدىڭ ءوزى دۇرىس ەسەپتەلمەگەن. از شىققان. سول از شىققان اقشانىڭ ءوزىن تۇگەل الا الماي وتىرمىز. ءوزىمنىڭ ەسەبىم بويىنشا شامامەن 130 مىڭ تەڭگەدەي اقشام تۇسپەگەن. وسى ماسەلە بويىنشا تەكسەرۋ جۇرگىزىلىپ، بىلىقتىڭ بەتى اشىلسا دەيمىن. جىلىنا ءبىر رەت الاتىن وتپۋسكنوي اقشامىزدىڭ ىرىڭ جىرىڭىن شىعارعان ادامداردىڭ جاۋاپ بەرۋىن سۇرايمىن. وسى اقشاعا سەنىپ ەدىك. وكىنىشكە قاراي، ىرىڭ جىرىڭى شىققان اقشامىزدىڭ جۇلىمى شىقتى دا، ەندى قارىزعا باتىپ، تۇك بىتىرمەگەن كۇيى قالىپ وتىرمىن. ەسەپشى وتپۋسكنويعا قانشا اقشا شىققانى تۋرالى كۆيتوك تا بەرمەي وتىر. بۇل قالاي بولعانى؟ بۇل اقشا ءبىزدىڭ ماڭداي تەرىمىزبەن كەلگەن اقشامىز عوي؟! نەگە بۇلاي ىرىڭ جىرىڭىن شىعارادى؟ بۇل ازداي، سوڭعى جارتى جىلدىق زەينەتاقى قورىنا تۇسۋگە ءتيىس جارنامىز دا سالىنباپتى. بانككە كرەديت سۇراپ بارىپ، وسىنى بىلدىك. بۇل بىلىقتىڭ بارىنە كىم جاۋاپ بەرەدى؟ نەگە ءبىز بۇلاي زارداپ شەگۋىمىز كەرەك؟ ءبىلىم ءمينيسترى اسحات ايماعامبەتوۆ تە ەگەر وتپۋسكنوي اقىسىندا پروبلەما بولسا، جاۋاپقا تارتاتىنىن مالىمدەگەن ەدى. ولاي بولسا، ءبىزدىڭ مەكتەپتەگى بۇل ماسەلە بويىنشا دا كىنالى ادامداردىڭ جاۋاپ بەرۋىن سۇرايمىن".
رەداكتسيانىڭ زەرتتەۋى ناتيجەسىندە حاتتا اتالعان مالىمەتتەر ءىشىنارا راستالدى، ياعني، جالاقىنى ارتىق ەسەپتەۋ فاكتىلەرىنىڭ ورىن العانىن، اتالعان مەكتەپتە ودان بەرى بۋحگالتەرلەر اۋىسىپ، ماسەلەنىڭ رەتتەلىپ جاتقانىن بىلدىك. دەسە دە بۇدان ءارى ءبىز بۇل ماسەلەگە وراي پاۆلودار وبلىستىق ءبىلىم باسقارماسىنان رەسمي تۇسىنىكتەمە كۇتەمىز.
حات اۆتورىنىڭ ەلەكتروندى پوشتاسى، بايلانىس مالىمەتتەرى رەداكتسيادا.
"ادىرنا" ۇلتتىق پورتالى
