«كوروناۆيرۋستىڭ ەكىنشى تولقىنى كەلە جاتىر» دەپ ەلىمىزدىڭ دەنساۋلىق ءمينيسترى سوڭعى كۇندەرى اقپارات بەتتەرىنەن تۇسپەي تۇر. ال قازاقستانداعى كەيبىر شەنەۋنىكتەر جاڭا جىلدىق دايىندىققا كىرىسىپ كەتىپتى. پاندەميا دەپ جانتالاسقان ۋاقىتتا شىرشا بەزەندىرىپ، جاڭا جىلدى وتشاشۋمەن قارسى الۋ... قيسىنعا كەلە مە؟ قازاقستاندا ءبارى دە مۇمكىن.
كوروناۆيرۋسقا جۇرت كۇمان كەلتىرسە، بيلىكتەگىلەر جاتىپ كەلىپ «رەنجيدى». ال ەندى شەنەۋنىكتەردىڭ شىرشا ىزدەپ، جاڭا جىلعا دايىندالعانىنا قاراساڭ، «كوروناۆيرۋس ساياسي ويىن» دەگەن جەل ءسوز راس پا دەپ تە قالاسىز. نەگە دەسەڭىز، مەملەكەتتىك ساتىپ الۋ پورتالىندا سوڭعى ۋاقىتتا جاڭا جىلدى قارسى الۋ شارالارىنا بايلانىستى تاپسىرىستار از تۇسپەپتى. بۇل تۋرالى kznews.kz اقپاراتتىق سايتى ەۋرازيا ارناسىنا سىلتەمە جاساپ حابارلادى.
ىندەتتىڭ ەكىنشى تولقىنى كەلە جاتىر دەگەن تسوي وتىرىكشى سەكىلدى كورىنەدى مىناۋ تاپسىرىستارعا قاراساڭىز. سەبەبى، مينيستر ايتقانداي، ەكىنشى الاپات اۋرۋ تولقىنى كەلە جاتسا، شەنەۋنىكتەرىمىز نەسىنە جەتىسىپ، شىرشا ىزدەپ جاتىر؟
مىسالى قاراعاندىداعى №23-مەكتەپ مۇنداي ازىرلىكتى ماۋسىم-شىلدە ايلارىندا باستاعان. ال بۇل ۋاقىتتا ءبىزدىڭ ەل ءولىم-جىتىمنەن ەندى-ەندى ەس جيىپ جاتقان ەدى. مەملەكەتتىك ساتىپ الۋ سايتىنداعى شىرشاعا بەرىلگەن تاپسىرىس بۇل سوزىمىزگە ايعاق بولا الادى. بىراق مەكتەپ ديرەكتورى بۇل تۋراسىندا ءبۇي دەيدى.
«شىرشانى ساتىپ الۋ جاڭا جىلعا دايىندىق باستادى دەگەن ءسوز ەمەس، ول بولاشاققا جوسپارلانعان جۇمىس. ەكىنشىدەن، شىرشانى مەملەكەتتىك ساتىپ الۋدىڭ باعا ۇسىنۋى بويىنشا وتكىزىلدى. العاشقى بەرىلگەن باعا 714 مىڭ تەڭگە. كونكۋرسقا 5 جابدىقتاۋشى قاتىستى. سونىڭ ىشىندە ەڭ تومەنگى باعا بەرگەن 446 555 تەڭگە»، – دەدى №23 مەكتەپتىڭ ديرەكتورى نۇركەن اشىقباەۆ.
بالقاش قالاسىنىڭ اكىمدىگىنە قاراستى تۇرعىن-ءۇي كوممۋنالدىق شارۋاشىلىعى جونىندەگى ءبولىم دە قىسقا دايىندىقتى الدەقاشان باستاپ كەتكەن. قالانى ەستەتيكالىق بەزەندىرۋگە باقانداي 13 ميلليون تەڭگەسىن شىتىرلاتىپ ساناپ بەرۋگە دايىن.
تالدىقورعان قالاسىنىڭ اكىمدىگى دە شاھار ورتالىعىن ودان سايىن اسەمدەۋ ءۇشىن 10 ميلليون تەڭگە بولگەلى وتىر. سونداي-اق قار تۇسپەي جاتىپ، قىسقا قامدانعانداردىڭ ءبىرى – نۇر-سۇلتان قالاسىنىڭ بايقوڭىر اۋدانى. عيماراتتاردى بەزەندىرۋگە بولىنگەن 17 ميلليون سومانى اكىمدىكتەگىلەر بىلايشا اقتاۋعا تىرىستى.
«سەيفۋلليننىڭ بويىندا بۇرىنعى بازار بولعان جەردە 5 ءۇي سالىندى عوي. الەۋمەتتىك جاعدايى تومەن وتباسىلارعا بەرىلدى. ەشقانداي جاڭا جىلدىڭ دايىندىعى ەمەس. جاڭا جىلعا تۇك قاتىسى جوق. بىلتىر بولىنگەن اقشا. ءۇي سالىنىپ جاتقاندا سونداي بەزەندىرۋگە قوسىمشا اقشا بولىنەدى. قىزىل جاسىل ءارتۇرلى سۆەتتەرى بار. ونداي كورىپ جۇرسىزدەر عوي، قالادا بۇكىل جەردە بار»، – دەدى بايقوڭىر اۋدانى اكىمىنىڭ ورىنباسارى ەرلان جاۋلىباەۆ.
جۇرت جانىن شۇبەرەككە ءتۇيىپ، مىناۋ ىندەتتەن قالاي امان شىعۋدى ۋايىمداپ وتىرعاندا، ۇيلەردىڭ سىرتىن بەزەندىرىپ، شىرشا الىپ، «بولاشاققا دايىندالعان» اتقامىنەرلەردىڭ بۇل ارەكەتىنە ەرىكسىز «بارەكەلدى!» دەگەننەن باسقا نە ايتۋعا بولادى؟ بىلايعى جۇرت كارانتيننەن جۇمىسسىز قالىپ، ۇكىمەتتىڭ يتكە سۇيەك تاستاعانداي ەتىپ بەرگەن 42500 تەڭگەسىنە تەلمىرىپ وتىر. ال قولىندا بيلىك تىزگىنى بار وزگەلەرى شىرشا مەن ويىنشىقتار الىپ، «سۆەتتەرمەن ۇيلەردى ساندەپ» الەك.
ءبىر قازاقستانداعى ەكى ءتۇرلى الەم. ەكى ءتۇرلى ءومىر. ءدال قازىر شىرشا بەزەندىرىپ، تويلايتىن ۋاقىت پا؟ بيۋدجەتتىڭ ءبۇيىرىن بولماشى، تۇككە كەرەگى جوق دۇنيەلەر ءۇشىن تەسىپ، اقشانى جەلگە شاشۋدىڭ اقىرى جاقسىلىققا سوقپاسى ءسوزسىز. شىرشا مەن ويىنشىققا جۇمساعان اقشانى اش وتىرعان اعايىنعا تاراتىپ بەرسە، سول ماڭىزدى ەمەس پە ەدى؟ جاڭا جىلدى اسىعا كۇتكەن كوكەلەر، سىزدەر باسىپ جۇرگەن قازاقتىڭ جەرىندە قانشاما ادام جوقشىلىقتان قينالىپ ءجۇر. قانشاما بالا باقىتسىز بالالىق شاقتىڭ كۇندەرىن وتكىزۋدە. جاساندى شىرشاعا جۇمسالاتىن اقشا سول بالاقايلاردىڭ كوز جاسىنا اينالماسىنا كەپىلدىك بار ما؟
مەرۋەرت حۋساينوۆا،
«ادىرنا» ۇلتتىق پورتالى.
