18 جەلتوقساندا الماتىنىڭ بارلىق اۋدانىندا جاڭا جىلدىق شىرشانىڭ شامى ءبىر ۋاقىتتا جاعىلدى. نەگىزگى مەرەكەلىك ءىس-شارا اباي الاڭىندا، رەسپۋبليكا سارايىنىڭ الدىندا ءوتتى. بۇل جەردە بيىكتىگى 22 مەتر بولاتىن قالانىڭ باس شىرشاسى ورناتىلدى. جاڭا جىل قارساڭىنداعى سالتاناتتى راسىمگە الماتى اكىمى دارحان ساتىبالدى مەن جۇزدەگەن قالا تۇرعىنى قاتىستى.
باس شىرشانى بەزەندىرۋگە 7 شاقىرىمنان استام جاڭا جىلدىق گيرلياندالار، سونداي-اق جارقىن ساندىك ەلەمەنتتەر، ۇلكەن جانە كىشى شىرشا ويىنشىقتارى، تاقىرىپتىق جاڭا جىلدىق اشەكەيلەر مەن جارىق كەسكىندەمەلەرى پايدالانىلدى.
قالا تۇرعىندارى مەن قوناقتارىنا زاماناۋي مۋلتيمەديالىق تەحنولوگيالاردى، اۋقىمدى جارىق بەزەندىرۋدى جانە قازاقستاندىق ەسترادانىڭ تانىمال ورىنداۋشىلارىنىڭ ونەرىن بىرىكتىرگەن مازمۇندى مەرەكەلىك باعدارلاما ۇسىنىلدى.
قالانىڭ جاڭا جىلدىق باس شىرشاسىنىڭ شامىن جاعۋ ءراسىمىنىڭ الدىندا رەسپۋبليكا سارايىنىڭ قاسبەتىندە ەكى مينۋتتىق لازەرلىك شوۋ كورسەتىلدى.
عيماراتتىڭ قاسبەتىندە الماتىنىڭ وزىندىك بولمىسىن بەينەلەيتىن اۋقىمدى جارىق كەسكىندەمەلەرى كورسەتىلدى. كورنەكى بەينەلەردە قالانىڭ تانىمال سيمۆولدارى — تاۋلار، بۇركىت بەينەسى، سونداي-اق جاڭا جىلدىق ەلەمەنتتەر قولدانىلدى. كومپوزيتسيانى جارقىن قار ۇشقىندارى، نازىك جارىق ورنەكتەرى مەن ديناميكالىق جارىق ساۋلەلەرى تولىقتىرىپ، مەرەكەلىك ءارى سالتاناتتى اتموسفەرا قالىپتاستىردى.
باعدارلامانىڭ تاعى ءبىر باستى بولىگى، جارىق شوۋىن اسەم تولىقتىرعان ساحنالىق فەيەرۆەرك بولدى، ول مەرەكەلىك كوڭىل كۇيدى ودان ءارى كۇشەيتتى.
كورەرمەندەرگە قازاقستاندىق ەسترادا جۇلدىزدارى، شوۋ-بالەت ارتيستەرى مەن مانەرلەپ سىرعاناۋشىلار ورىنداعان «كەل، جاڭا جىل!» ۆوكالدى-حورەوگرافيالىق كومپوزيتسياسى ۇسىنىلدى. سونداي-اق، ساحنادا قازاقستاننىڭ حالىق ءارتيسى روزا رىمباەۆا، ءالي وقاپوۆ، ءمادي رىمباەۆ، «كەشYOU»، «جىگىتتەر»، «Astra» توپتارى، سونداي-اق بالجان بيداش پەن Kodi ونەر كورسەتتى.
جاڭا جىلدىق شىرشالاردىڭ شامىن جاعۋ سالتاناتتى راسىمدەرى قالانىڭ بارلىق سەگىز اۋدانىندا ءوتتى. مەرەكەلىك الاڭدار كەلەسى مەكەنجايلاردا ورنالاسقان:
جەتىسۋ اۋدانى — «گۇلدەر» ساياباعى (سەرىكوۆ كوش.، 2ا)
بوستاندىق اۋدانى — «اتاكەنت» قىءىو
اۋەزوۆ اۋدانى — Family Park
مەدەۋ اۋدانى — 28 گۆاردياشى-پانفيلوۆشىلار اتىنداعى ساياباق
الاتاۋ اۋدانى — «الماتى ارەنا» سپورت كەشەنى
ناۋرىزباي اۋدانى — شۇعىلا شاعىناۋدانى، 347 (امفيتەاتر)
تۇركسىب اۋدانى — №6 وقۋشىلار ءۇيى (سەيفۋللين كوش.، 13/1)
المالى اۋدانى — اباي اتىنداعى قازۇتوب
