پارلامەنت سايلاۋىندا الاڭعا شىققان جۇرتپەن جاعا جىرتىسقان بوكسشى، 2000 جىلعى وليمپيادا ويىندارىنىڭ چەمپيونى ەرماحان يبرايموۆتىڭ ۇستىنەن ارىز ءتۇستى، – دەپ حابارلايدى «ادىرنا» ۇلتتىق پورتالى Newsroom+اقپارات اگەنتتىگىنە سىلتەمە جاساپ.
بەلسەندىلەر سايلاۋ كۇنى وزدەرىنە قوقان-لوقى كورسەتكەن ەرماحان يبرايموۆتىڭ ۇستىنەن پوليتسياعا ارىز بەرەتىنىن مالىمدەدى.
“25 قاڭتاردا ساعات 10.00-دە زاڭگەر ەرلان قاليەۆپەن بىرگە الماتى پوليتسيا دەپارتامەنتىنە ەرماحان يبرايموۆكە ارىز بەرۋگە بارامىز”، – دەپ جازدى Facebook-تە “دەموكراتيالىق پارتيا” قۇرۋ جونىندەگى باستاماشىل توپتىڭ بەلسەندىسى ايگەرىم تىلەۋجان.
بوكسشى الماتىداعى جانبولات ماماي باستاعان بەلسەندىلەر ۇيىمداستىرعان ەرەۋىلگە ارنايى بارعانى جانە ولاردىڭ ءوز پىكىرىن بىلدىرۋىنە قارسى ەكەنىن ايتقان.
“جانبولات ماماي مەن ونىڭ جاقتاستارى”پرەزيدەنت – كەت! نۇر وتان – كەت!”- دەگەن وسى تەكتەس سوزدەرمەن پلاكات ۇستاپ تۇردى. ياعني، بۇل ادامدار ءبىزدىڭ وتىز جىل بويى قۇرعان قوعامىمىزعا جانە ونىڭ بىرلىگىنە قول سۇعۋدى ويلاعان. جانبولات ماماي دەگەن كىم؟! ول وتىز جاستاعى ءالى ومىردە ەشتەڭەگە قول جەتكىزە الماعان بوقمۇرىن. ال مەن ءوز ەلىم ءۇشىن كۇرەسىپ، مەملەكەتتىڭ داڭقىن اسىرىپ، ءتۇرلى جارىستاردا قازاقستاننىڭ نامىسىن قورعاپ، وليمپيادا چەمپيونى اتاندىم. سوندىقتان مەن كەيبىر ادامدار وسىنداي قورلايتىن ۇراندارمەن سويلەي باستاعاندا، جاي قاراپ تۇرا المايمىن”، – دەگەن بولاتىن بوكسشى.
ايتا كەتەلىك 10 قاڭتاردا بيلىك وپپونەنتى جانبولات مامايدىڭ جاقتاستارى سايلاۋعا بويكوت جاريالاپ، نارازىلىق بىلدىرگەن. ەرماحان يبرايموۆ ميتينگىگە شىققان جۇرتتى ۇركىتىپ-قورقىتىپ، نارازىلىق بىلدىرۋشىلەردىڭ پلاكاتتارىن قاق ايىرعان.
قاۋىپسىزدىك كۇشتەرىنىڭ قورشاۋىندا قالعان بەلسەندىلەر “ەرماحان، كەت!” دەپ ايقايلادى، سودان كەيىن بوكسشى وقيعا ورنىنان كەتىپ قالعان ەدى.
