ەجىكتەپ وقيتىن مۇعالىم مەكتەپكە قالاي ورنالاستى؟

3519
Adyrna.kz Telegram

تۇركىستان وبلىسىنداعى مەكتەپتە ەجىكتەپ وقيتىن مۇعالىمنىڭ جۇمىسقا قالاي ورنالاسقانى بەلگىلى بولدى، - دەپ حابارلايدى Tengrinews.kz.

2019 جىلى 19 ناۋرىزدا مەكتەپتە jumys.snation.kz بوس جۇمىس ورىندارى بازاسىنا ورىس ءتىلى جانە ادەبيەتى پانىنە بوس ورىن جاريالانعان. ال تىركەلۋ مەرزىمى 2019 جىلدىڭ 4 ساۋىردە اياقتالعان. وسى مەرزىم ارالىعىندا بوس جۇمىس ورنىنا ورنالاسۋعا 1 ۇمىتكەر - تۋرسىنباەۆا سيتورا ۋكتامباەۆنا تىركەلگەن. ارتىنشا ول 2019 جىلدىڭ 1 ساۋىرىندە بوس جۇمىس ورنىنا تەست تاپسىرۋ ءۇشىن تىركەلگەن.

بوس جۇمىس ورنىنا ورنالاسۋ ءۇشىن ءبىرىنشى كەزەڭ تەستىلەۋگە 2019 جىلدىڭ 17 ساۋىرىندە قاتىسقان. ءبىرىنشى كەزەڭنەن 53 بالمەن وتكەن، شەكتىك بالل 50 بالل بولعان. كونكۋرستىڭ ەكىنشى كەزەڭىنە 22 ساۋىردە قاتىسىپ، كوميسسيا قورىتىندىسى بويىنشا 18 بالل جيناپ، بوس جۇمىس ورنىنا ۇسىنىلعان.

مۇعالىم مەكتەپكە قازاقستان رەسپۋبليكاسىنىڭ ەڭبەك كودەكسىنىڭ 34-بابىنا سايكەس 02.05.2019 جىلى قابىلدانعان. ورىس ءتىلى جانە ادەبيەت ءپانىنىڭ مۇعالىمى تۋرسىنباەۆا سيتورا ۋكتامباەۆنا 1992 جىلى 11 اقپاندا سارىاعاش اۋدانى، ىنتىماق ەلدى مەكەنىندە دۇنيەگە كەلگەن. ۇلتى - تاجىك. قازاقستان رەسپۋبليكاسىنىڭ ازاماتى.

وڭتۇستىك قازاقستان پەداگوگيكالىق ۋنيۆەرسيتەتىندە ورىس ءتىلى جانە ادەبيەتى ماماندىعى بويىنشا ءبىلىم الىپ، 2018 جىلى اتالعان وقۋ ورنىن اياقتاعان.

ەسكە سالايىق، كەشە سارىاعاش اۋدانىنداعى مەكتەپتەردىڭ بىرىندە ورىس ءتىلىن ءپاندى مەڭگەرمەگەن، سونىمەن قاتار ەجىكتەپ وقيتىن مۇعالىم وقىتاتىنى بەلگىلى بولدى. بۇل تۋرالى "وتىرار" تەلەكومپانياسىنىڭ سيۋجەتىندە ايتىلعان.

تىلشىلەردىڭ مالىمەتىنشە، مۇعالىم ىنتىماق اۋىلىنداعى مەكتەپتە ورىس ءتىلى پانىنەن 1 ناۋرىزعا دەيىن ساباق بەرىپ، كەيىن جۇكتىلىگىنە بايلانىستى دەمالىسقا شىققان.

پىكىرلەر