سەمەيدەگى يۋنوست شاعىن اۋدانىنىڭ تۇرعىندارى ەكى اپتادان بەرى لايلانعان اۋىز سۋ ءىشىپ وتىر دەپ حابارلايدى "ادىرنا" ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.
تىرشىلىك كوزىنەن ابدەن تارىققان جۇرت سۋدى ءسۇزىپ، كەرەگىنە جاراتىپ، ولمەستىڭ كۇنىن كەشۋدە. ولار سۋدى تۇندىرىپ ءىشىپ وتىر. سۋدىڭ قۇرامىنداعى قيىرشىق تاستار مەن زياندى زاتتار سۇزگىدەن ءوتۋ ءۇشىن كەمى 1 تاۋلىك تۇنىپ تۇرۋى ءتيىس. تۇرعىندار قازىر لاي سۋدى ءىشىپ جۇرگەن بالالاردىڭ دەنساۋلىعىنا الاڭدايدى.
"راسىندا دا ەكى جۇما بولدى قۇم ارالاسقان سۋ اعىپ تۇر. قايتا-قايتا سانتەحنيك شاقىرامىز، قۇبىرلار بىتەلىپ قالادى. اۋىزسۋدى دۇكەننەن ساتىپ الىپ ءىشىپ وتىرمىز. اقشاسىن ءبارىن ءوزىمىز تولەيمىز", — دەيدى قالا تۇرعىنى ايتبالا جانسۇلتانوۆا.
ساپاسىز سۋدان تۇرعىنداردىڭ دەنساۋلىعى عانا ەمەس، تەحنيكالار دا شەتىنەن ءبۇلىنىپ جاتىر. ماسەلەن، تۇرعىن ۇيلەردەگى بىرنەشە ادامنىڭ كىر جۋاتىن جانە ىدىس جۋاتىن ماشينالارى جارامسىز جاعدايعا تۇسكەن. ال ەندى ءبىرىنىڭ جاڭادان ورناتقان سۋ كولونكالارى ىستەن شىعىپتى.
جەرگىلىكتى اكىمدىك وكىلدەرىنىڭ سوزىنشە، يۋنوست شاعىن اۋدانىنداعى تۇيتكىلگە ابدەن توزىعى جەتكەن كوممۋنالدىق جۇيەلەر سەبەپ. توت باسقان قۇبىردان ءدال وسىنداي لايلانعان سۋ اعادى.
"قۇبىرلار توزعان سەبەبىنەن ءبىز سۋدى توقتاتۋعا ءماجبۇر بولدىق. ويتكەنى، جارىلىستار بولدى. سول سەبەپتى سۋ قايتادان بەرىلگەن كەزدە وسىلاي قۇم شىقتى. ءبىز قازىر جاڭا قۇبىرلار سالۋعا وبلىستىق جانە رەسپۋبليكالىق بيۋدجەتتەن قاراجات سۇراپ وتىرمىز", — دەيدى سەمەي قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ باس مامانى ەلدوس ەسەنتاي.
مامانداردىڭ سوزىنشە، جەرگىلىكتى قازىنادا قارجى جوق. ەندىگى ءۇمىت — وبلىستىق نەمەسە رەسپۋبليكالىق بيۋدجەتتە. ال ول قارجى قاشان بولىنەتىنى بەلگىسىز.
"ادىرنا" ۇلتتىق پورتالى.
