Semeıdegi Iýnost shaǵyn aýdanynyń turǵyndary eki aptadan beri laılanǵan aýyz sý iship otyr dep habarlaıdy "Adyrna" ulttyq portaly «Eýrazııa» birinshi arnasyna silteme jasap.
Tirshilik kózinen ábden taryqqan jurt sýdy súzip, keregine jaratyp, ólmestiń kúnin keshýde. Olar sýdy tundyryp iship otyr. Sýdyń quramyndaǵy qıyrshyq tastar men zııandy zattar súzgiden ótý úshin kemi 1 táýlik tunyp turýy tıis. Turǵyndar qazir laı sýdy iship júrgen balalardyń densaýlyǵyna alańdaıdy.
"Rasynda da eki juma boldy qum aralasqan sý aǵyp tur. Qaıta-qaıta santehnık shaqyramyz, qubyrlar bitelip qalady. Aýyzsýdy dúkennen satyp alyp iship otyrmyz. Aqshasyn bárin ózimiz tóleımiz", — deıdi qala turǵyny Aıtbala Jansultanova.
Sapasyz sýdan turǵyndardyń densaýlyǵy ǵana emes, tehnıkalar da shetinen búlinip jatyr. Máselen, turǵyn úılerdegi birneshe adamnyń kir jýatyn jáne ydys jýatyn mashınalary jaramsyz jaǵdaıǵa túsken. Al endi biriniń jańadan ornatqan sý kolonkalary isten shyǵypty.
Jergilikti ákimdik ókilderiniń sózinshe, Iýnost shaǵyn aýdanyndaǵy túıtkilge ábden tozyǵy jetken kommýnaldyq júıeler sebep. Tot basqan qubyrdan dál osyndaı laılanǵan sý aǵady.
"Qubyrlar tozǵan sebebinen biz sýdy toqtatýǵa májbúr boldyq. Óıtkeni, jarylystar boldy. Sol sebepti sý qaıtadan berilgen kezde osylaı qum shyqty. Biz qazir jańa qubyrlar salýǵa oblystyq jáne respýblıkalyq bıýdjetten qarajat surap otyrmyz", — deıdi Semeı qalalyq turǵyn úı-kommýnaldyq sharýashylyǵy bóliminiń bas mamany Eldos Esentaı.
Mamandardyń sózinshe, jergilikti qazynada qarjy joq. Endigi úmit — oblystyq nemese respýblıkalyq bıýdjette. Al ol qarjy qashan bólinetini belgisiz.
"Adyrna" ulttyq portaly.
