قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ۇكىمەت وتىرىسىندا مەملەكەت باسشىسى قاسىم-جومارت توقاەۆتىڭ 2021 جىلعى 1 قىركۇيەكتەگى «حالىق بىرلىگى جانە جۇيەلى رەفورمالار-ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا ايتىلعان الەۋمەتتىك – ەڭبەك سالاسى بويىنشا تاپسىرمالاردىڭ قالاي ورىندالاتىنى تۋرالى ايتىپ بەردى، دەپ حابارلايدى «ادىرنا» ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
«مەملەكەت باسشىسى جاريالاعان باستامالارعا سايكەس ەڭبەكاقى تولەۋدى ارتتىرۋ بويىنشا شارالار قابىلداناتىن بولادى. ءبىرىنشى، 2022 جىلعى 1 قاڭتاردان باستاپ ەتج مولشەرى 60 مىڭ تەڭگەنى قۇرايدى. بۇل شارا 1 ملن 650 مىڭ جالدامالى قىزمەتكەردىڭ اقشالاي تابىستارىنىڭ وسۋىنە الىپ كەلەدى. بۇل سونداي-اق رازريادارالىق بىلىكتىلىك جۇيەسىن ەسكەرە وتىرىپ، باسقا دا قىزمەتكەرلەردىڭ كىرىستەرىن ارتتىرۋعا مۇمكىندىك بەرەدى. ەكىنشىدەن، 4 جىل ىشىندە ازاماتتىق قىزمەتشىلەردىڭ جەكەلەگەن 588 مىڭ ساناتىنىڭ (مۇراعاتشىلار، كىتاپحاناشىلار، مۋزەيتانۋشىلار، ورمانشىلار، تەحنيكالىق پەرسونال جانە ت.ب.) جالاقىسىن كەزەڭ-كەزەڭىمەن ارتتىرۋ ءۇشىن ۇكىمەت قاۋلىسىنىڭ جوباسى ازىرلەنەدى. ناتيجەسىندە، 2022 جىلدان باستاپ ولاردىڭ جالاقىسى جىل سايىن 20% - عا ارتىپ، 2025 جىلعا قاراي ەكى ەسەگە ارتادى. ەڭ تومەنگى جالاقى 49 مىڭنان 60 مىڭ تەڭگەگە دەيىن نەمەسە 22% - عا وسەدى»،— دەدى سەرىك شاپكەنوۆ.
«ادىرنا» ۇلتتىق پورتالى
