Ärbır qazaqstandyq aluy tiıs 10 sotyq jerdı alu prosesı barynşa aşyq bolady. Al avtomatizasiia arqasynda būl proseske 5 minut jetkılıktı. Būl turaly Sifrlyq damu, innovasiialar jäne aeroǧaryş önerkäsıbı ministrlıgı mälımdedı, dep habarlaidy “Adyrna” ūlttyq portaly.
Qyzmettı paidalanu üşın eGov.kz portalyna kırıp, «Jyljymaityn mülık» – «Jer qatynastary» bölımınen «Jeke tūrǧyn üi qūrylysyna jer uchaskesın (10 sotyq jer) aluǧa kezektı qarau nemese kezekke tūru» qyzmetın taŋdau qajet.
Ärı qarai ötınış türın taŋdau kerek. Bügınde portalda ötınıştıŋ üş türı bar:
– kezekke qoiu;
derekterdı özektendıru;
– kezekten şyǧaru.
Eger sız jer uchaskesın alu üşın kezekke alǧaş ret ötınış bıldırıp tūrsaŋyz, onda özıŋız jer aludy qalaityn aimaqty taŋdaisyz.
Eger sız būdan būryn jer kezegıne tūrǧan bolsaŋyz, bıraq ol turaly aqparat tappasaŋyz, onda «Özektendıru» ötınış türın taŋdauyŋyz qajet.
Kezek alǧanyŋyzdy rastau üşın qolyŋyzda bar qūjatty (talonnyŋ skan-nūsqasy, ötınıştıŋ, jeke kuälıktıŋ jäne t.b. köşırmelerı) jükteu qajet. Sondai-aq kezek retın www.map.gov4c.kz/egkn/ saitynda ESQ arqyly avtorizasiiadan ötıp, baqylap otyruǧa bolady.
Būdan būryn alǧan jer kezegınen bas tartu üşın «Şyǧaru» ötınış türın taŋdau qajet.
Eger azamat būdan būryn memleketten tegın jer telımın alǧan bolsa nemese eldımekende JTQ üşın bos jer telımı bolmasa, jer kezegıne ötınış bere almaidy. Bos uchaskelerdı beru jönındegı şeşımdı äkımdıkter qabyldaidy. Uchaskeler alaŋdardyŋ daiyn boluyna qarai nemese eldımekennıŋ bas josparyna säikes, bos aumaqtar bolǧan jaǧdaida berıletın bolady.
Eger būryn bır öŋırde jer telımıne kezekke tūrǧan bolsaŋyz, al qazır özge aimaqtan jer aluǧa niettenseŋız, 10 sotyqqa kezek retı erterek kelgen öŋırden jer bır ret qana berıletının, qalǧan ötınışterdıŋ küşı joiylatynyn eskeru qajet.
Esterıŋızge sala keteiık, būryn qazaqstandyqtar JTQ üşın jer uchaskesın alu kezegıne tūru üşın jergılıktı atqaruşy organdarǧa, iaǧni äkımdıkterge jügınetın. Olar tek öz aimaǧynyŋ jerlerın taŋdai alatyn. Kezekte tūrǧandardyŋ tızımı de tek äkımdıkterde saqtalatyn.
QR Jer kodeksınıŋ 50-babyna säikes, Qazaqstannyŋ ärbır azamaty jeke tūrǧyn üi qūrylysy üşın jer uchaskesın (10 sotyq jer) tegın aluǧa qūqyly.
“Adyrna” ūlttyq portaly
