Almaty oblysynyŋ Qarasai audanynda Aqsai özenınıŋ jaǧalauyn su şaiyp ketuıne bailanysty jergılıktı deŋgeidegı tötenşe jaǧdai jariialandy, dep habarlaidy "Adyrna" ūlttyq portaly.
Almaty oblysy äkımdıgınıŋ mälımetınşe, 2 şılde künı saǧat 06:50 şamasynda Qarasai audanynyŋ Jaŋatūrmys auylyndaǧy «Aqsai karerı» JŞS aumaǧynda Aqsai özenınıŋ jaǧalauyn su şaiyp, karerdıŋ soltüstık-batys bölıgınde topyraq syrǧyǧan.
Oqiǧa ornyna tiıstı qyzmetter jedel jıberıldı. Qauıpsızdık maqsatynda jaqyn maŋdaǧy toǧyz jeke tūrǧyn üidıŋ tūrǧyndary uaqytşa qauıpsız jerge köşırıldı. Qazırgı uaqytta mamandar aumaqty tekserıp, jaǧdaidy tūraqtandyruǧa baǧyttalǧan qajettı jūmystardy jürgızıp jatyr.
İnjenerlık jäne qalpyna keltıru jūmystaryna barlyǧy 19 qyzmetker men 14 arnaiy tehnika jūmyldyrylǧan.
Äkımdıktıŋ habarlauynşa, tūrǧyndarǧa tüsındıru jūmystary jürgızılıp, olardyŋ qauıpsızdıgın qamtamasyz etu boiynşa barlyq qajettı şaralar qabyldanuda.
«Qalyptasqan jaǧdaiǧa bailanysty Qarasai audanynda jergılıktı deŋgeidegı tötenşe jaǧdai jariialandy. Būl şeşım qajettı jūmystardy jedel jürgızıp, tiımdı üilestıruge mümkındık beredı. Almaty oblysynyŋ qalǧan audandaryndaǧy jaǧdai tūraqty», – delıngen oblys äkımdıgınıŋ habarlamasynda.
Vedomstvonyŋ mälımetınşe, atqarylyp jatqan jūmystar Almaty oblysynyŋ äkımı men salalyq memlekettık organdardyŋ tūraqty baqylauynda.
Äkımdık tūrǧyndardy sabyr saqtauǧa, uäkılettı organdardyŋ talaptaryn oryndauǧa jäne tek resmi aqparat közderıne senuge şaqyrdy.
