Qazaqstanda äzırlengen qaterlı ısıkke qarsy otandyq preparatty 2027 jyly tırkeu josparlanyp otyr, dep habarlaidy "Adyrna" ūlttyq portaly.
Qazır därı pasientterdıŋ qatysuymen klinikalyq synaqtardyŋ ekınşı kezeŋınen ötıp jatyr. Būl turaly ǧylym jäne joǧary bılım ministrı Saiasat Nūrbek aitty.
Preparattyŋ klinikalyq synaqtary Astanadaǧy onkologiialyq ortalyq bazasynda jürgızılude. Qazırgı kezeŋde mamandar därınıŋ qajettı dozasyn anyqtap, onyŋ ärtürlı mölşerınıŋ pasient aǧzasyna äserın zerttep jatyr.
«Qazır pasientterge dozany testıleu kezeŋı jürıp jatyr. Jyl soŋyna deiın barlyq prosedurany aiaqtap, preparatty tırkeuge beruge tyrysamyz», – dedı ministr Ükımettegı brifingte.
Ekınşı kezeŋdegı klinikalyq zertteuler aiaqtalǧannan keiın alynǧan nätijeler saraptamaǧa jıberıledı. Būdan soŋ preparatty Ūlttyq därılık zattar men medisinalyq būiymdardy saraptau ortalyǧy arqyly memlekettık tırkeuden ötkızu räsımı bastalady.
Saiasat Nūrbektıŋ aituynşa, preparatty tırkeu jūmystary biyl aiaqtalsa, därı kelesı jyly Qazaqstanda qoldanysqa şyǧuy mümkın.
"Sırä, kelesı jyly bolady. Öitkenı biylǧy jyldyŋ soŋyna deiın barlyq prosedurany aiaqtap, Densaulyq saqtau ministrlıgımen qajettı jūmystardy jürgızuımız kerek", – dedı ol.
Alǧaşqy kezeŋde preparatty Qazaqstanda jäne Euraziialyq ekonomikalyq odaq elderınde qoldanu üşın tırkeu josparlanǧan. Al basqa memleketterdıŋ naryǧyna şyǧaru üşın preparat sol elderdıŋ talaptaryna säikes qosymşa tırkeu räsımderınen ötuı tiıs. Qazaqstandyq preparatty ǧalym Dos Sarbasov bastaǧan mamandar äzırlegen. 2025 jyldyŋ qaraşasynda preparattyŋ klinikalyq synaqtarynyŋ şeşuşı kezeŋıne ötkenı habarlanǧan.
2026 jylǧy 31 nauryzda otandyq DVC preparatynyŋ adamdarǧa jürgızıletın klinikalyq synaqtary bastalǧany belgılı boldy. Zertteu Ūlttyq ǧylymi onkologiia ortalyǧynyŋ bazasynda jürgızıldı.
2026 jyldyŋ mamyrynda Saiasat Nūrbek preparattyŋ adamdarǧa jürgızılgen klinikalyq synaqtarynyŋ alǧaşqy kezeŋı aiaqtalǧanyn habarlaǧan. Onyŋ aituynşa, zertteuge qatysqan pasientterdıŋ barlyǧy aman qalǧan, al keibırınde ısık kölemınıŋ azaiǧany baiqalǧan.
Qazır mamandar preparattyŋ dozasyn jäne pasientterdıŋ aǧzasyna äserın baǧalau boiynşa zertteulerdı jalǧastyryp jatyr. Preparattyŋ naqty tiımdılıgı men qauıpsızdıgı klinikalyq synaqtardyŋ barlyq kezeŋı aiaqtalyp, tiıstı saraptama men memlekettık tırkeu räsımderı jürgızılgennen keiın anyqtalady.
