Dıni köşbasşylar Jahandyq beibıtşılık qozǧalysynyŋ moraldyq özegıne ainala alady. Būl turaly Astanada ötken Älemdık jäne dästürlı dınder liderlerı sezı hatşylyǧynyŋ XXIV otyrysynda vise-prezident, sez hatşylyǧynyŋ töraǧasy Erlan Qarin mälımdedı, dep habarlaidy «Adyrna» tılşısı.
Onyŋ aituynşa, 2022 jyly ötken Älemdık jäne dästürlı dınder liderlerınıŋ VII sezınde memleket basşysy Qasym-Jomart Toqaev jaŋa Jahandyq beibıtşılık qozǧalysyn qūru turaly bastama kötergen. Al VIII sezde būl ideiany sezd aiasynda jan-jaqty talqylaudy ūsynǧan.
«Būl bastama dıni qauymdastyqtardyŋ bıtımgerlık äleuetın bırıktırıp, halyqaralyq qatynastardaǧy ruhani diplomatiianyŋ rölın küşeituge baǧyttalǧan», – dedı Erlan Qarin.
Ol sondai-aq dıni köşbasşylar zorlyq-zombylyqty toqtatuǧa jäne qaqtyǧystardy beibıt jolmen şeşuge ündeitın bırıktıruşı, saiasilanbaǧan ündeu jasai alatynyn atap öttı.
Qarinnıŋ sözınşe, VIII sezdıŋ qorytyndysy boiynşa qabyldanǧan Astana beibıtşılık deklarasiiasy beibıtşılık pen qauıpsızdık, ekstremizmge qarsy küres jäne dıni nysandardy qorǧau mäselelerı boiynşa ortaq ūstanymdy aiqyndaidy.
Sonymen qatar deklarasiiada jastar men äielderdıŋ qoǧamdaǧy rölı, qorşaǧan ortany qorǧau jäne jaŋa tehnologiialardy qoldanudyŋ etikalyq qaǧidattary da qamtylǧan.
«Bız sondai-aq deklarasiiany ılgerıletu jäne onyŋ ıs jüzınde jüzege asyryluyn qoldau jönındegı jol kartasyn qabyldadyq», – dep qosty ol.
