Tina Kandelaki Qazaqstan men Ūlybritaniia arasyndaǧy äskeri kelısımdı synap, ony «tarihty bılmeitın eldıŋ» qadamyna balady, dep habarlaidy “Adyrna”.
Onyŋ aituynşa, Qazaqstan men Ūlybritaniia qorǧanys vedomstvolary arasynda äskeri ärıptestık turaly kelısım jasalǧany jūma, 6 mausym künı belgılı bolǧan.
“Eger bır jaŋalyqty eşkım baiqamasyn deseŋ – ony jūma keşke jariiala” deidı Kandelaki.
Onyŋ paiymdauynşa, jeksenbı künı Qazaqstannyŋ Qorǧanys ministrı qyzmetınen bosatylǧany būl kelısımdı «jasyru äreketın» rastaidy. Būǧan qosa, demalys künderı Londonmen aradaǧy kelısım turaly jaŋalyq Qazaqstan Qorǧanys ministrlıgınıŋ saitynan alynyp tastalǧanyn da aityp öttı.
“Reseidıŋ qas jauy sanalatyn elmen äskeri ärıptestık ornatu – būl temırjol stansiialaryn qaita atau emes. Byltyr osyǧan qatysty pıkırım üşın menı Qazaqstannyŋ №1 jauy etıp şyǧarǧan. Bıraq būl – odan da kürdelı mäsele. Eske salaiyn, Qazaqstan – ŪQŞŪ-nyŋ (Ūjymdyq qauıpsızdık turaly şart ūiymy – red.) müşesı. Däl osy äskeri blok 2021 jyldyŋ qaŋtarynda prezident Toqaev pen onyŋ ainalasyn äskeri töŋkerısten qūtqaryp qaldy. Vengriia nemese Slovakiia EO-nyŋ syrtqy saiasatymen kelıspei tūrsa da, Reseimen äskeri kelısımge otyra qoimas edı.
Aita ketsek, 6 mausym künı Qazaqstan men Ūlybritaniianyŋ qorǧanys ministrlıkterı äskeri yntymaqtastyq josparyna qol qoiǧany habarlanǧan. Qūjatqa säikes, taraptar beibıtşılıktı saqtau, tıldık daiyndyq jäne qazaqstandyq äskeri qyzmetkerlerdı Ūlybritaniianyŋ joǧary äskeri oqu oryndarynda oqytu baǧytynda jūmys ıstemek.
Eske sala keteiık, Tina Kandelaki būǧan deiın de Qazaqstandaǧy orys tılınıŋ qoldanysyna qatysty bırneşe ret mälımdeme jasaǧan. Atap aitqanda, eldegı temırjol stansiialaryn qazaqşalau bastamasyna qarsy şyqqan. Osy mälımdemelerden keiın Qazaqstannyŋ Syrtqy ıster ministrlıgı oǧan elge kıruge tyiym saldy.
Sondai-aq, būǧan deiın Deutsche Welle aqparat agenttıgı Qazaqstanda elge kıruge tyiym salynǧan tūlǧalardyŋ «qara tızımı» bar ekenın habarlaǧan. Būl tızımde Kandelakiden bölek Resei memlekettık dumasynyŋ deputattary Petr Tolstoi, Evgenii Fiodorov, Konstantin Zatulin, Viacheslav Nikonov, jürgızuşı Tigran Keosaian, filosof Aleksandr Dugin, Rossotrudnichestvo basşysy Evgenii Primakov jäne saiasattanuşy Nikita Mendkovich te bar.
